މި ސަރުކާރުގެ ސިޔާސީ މަގާމުތަކުގެ އަދަދު ދެހާހަށްވުރެ މަތިވެ، ދައުލަތުގެ ބަޖެޓުން މަހަކު ސާޅީސް މިލިއަން ރުފިޔާ މުސާރަ ދިނުމަށް ހޭދަކުރާކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އަމީރު މިފަދައިން ވިދާޅުވެފައި ވަނީ އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެވެ.

އެގޮތުން އަމީރު ވިދާޅުވީ ސަރުކާރުން ހަރަދު ކުޑަކުރަން ކިޔާއިރު، ސިޔާސީ މަގާމުގެ އަދަދު 2280 އަށް އަރާކަމަށެވެ. މީ ރައީސް މުހައްމަދު މުއިއްޒު ސިޔާސީ މަގާމުތައް 700 އަށްވުރެ މަތި ނުކުރައްވާނެކަމަށް ވިދާޅުވި އަދަދަށްވުރެ 1580 އިތުރު އަދަދެއް ކަމަށްވެސް އަމީރު ވަނީ ވިދާޅުވެފައެވެ.

އަމީރު އިތުރަށް ވިދާޅުވީ ހަރަދު ކުޑަކުރުމުގެ ގޮތުން ބޭނުންވާ ވަރަށްވުރެ އިތުރަށް ނަގާފައިވާ ހުރިހާ ސިޔާސީ މަގާމުތައް މަދުކުރަން ޖެހޭކަމަށެވެ.މީގެ އިތުރުން އަމީރު ވިދާޅުވީ ޓެކްސްތައް ބޮޑުކުރަނީ ސަރުކާރު ފެއިލްވެގެން ކަމަށެވެ. ޓެކްސް ބޮޑުކުރަން ޖެހުނީ ސަރުކާރުގެ ފައިނޭންސިން ސްޓްރެޓަޖީ ފެއިލްވެގެން ކަމަށްވެސް އޭނާ ވިދާޅުވި އެވެ.

ރާއްޖޭގެ މާލީ ހާލަތާއި އިގްތިސޯދީ ހާލަތު ދައްވަމުން ދާ މި ދަނޑިވަޅުގައި ހަރަދުކުޑަކުރަން އަވަސް ފިޔަވަޅުތަކެއް އަޅަން ޖެހޭކަމަށް ވޯލްޑް ބޭންކުންވެސް ވަނީ ބުނެފަ އެވެ.

މި މަސްތެރޭގައި ރައީސް މުއިއްޒު ވަނީ ސިޔާސީ މުވައްޒަފުންގެ ތެރެއިން 228 މީހަކު ވަކިކުރައްވާނެކަމަށް ވިދާޅުވެފަ އެވެ. ނަމަވެސް ސިޔާސީ މަގާމުތަކުގެ ޖުމްލަ އަދަދު ސަރުކާރުން ވަނީ ސިއްރުކޮށްފަ އެވެ. އިދިކޮޅުން ބުނަނީ ސިޔާސީ މަގާމުތަކުން ވަކިކުރާ ފަރާތްތަކަށް ސަރުކާރު ކުންފުނިތަކުން ވަޒީފާ ހަމަޖައްސާނެކަމަށް ބެލެވޭ ކަމަށެވެ.

މިހާރު ޓެކްސް ބޮޑުކޮށްގެން ޓޫރިޒަމް ސިނާއަތަށް ކުރާނީ ނޭދެވޭ އަސަރުކަމަށާއި ޓެކްސް ބޮޑުކުރާއިރު ފަތުރުވެރިކަމުގެ ސިނާއަތުގެ ޓްރެންޑްތައް ބަލަންޖެހޭ ކަމަށް ވެސް އަމީރު ވިދާޅުވި އެވެ.