ގައުމުގައި އަނދިރި ދުވަސްތައް ކުރިއަށް އަދި އޮތީކަމަށް ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ. ޖަމީލު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ރާއްޖޭގައި ޑޮލަރުގެ ދަތިކަން ހުރުމުން ބީއެމްއެލުން ކާޑުން ނެގޭ ޑޮލަރު ލިމިޓުކޮށް ރުފިޔާ ކާޑަށް ޑޮލަރުން މުއާމަލާތް ނުކުރެވޭ ގޮތް އެ ބޭންކުން ހެދުމުން ރައީސް މުހައްމަދު މުއިއްޒު އެ ބޭންކުގެ އީސީއޯ ރައީސް އޮފީހަށް ހާޒިރުކޮށް ބިރު ދައްކާ ވަނީ އަލުން އެނިންމުން ބަދަލުކުރުވާފައެވެ.

އެހެންކަމުން ޑޮލަރުގެ ދަތިކަމަށް ހައްލު ގެނައުމަށް، ރައީސް މުއިއްޒު ވެރިކަމުގެ ކުރީ ކޮޅު ތުރުކީއަށް ވަޑައިގެން ގެންނެވި ޑްރޯންތައް ވިއްކާލާ އަނބުރާ ފައިސާ ހޯދަން ޖެހޭ ކަމަށް އެކްސްގައި ހަސަން ކުރުސީގެ ނަމުގައި ހިންގާ ހެންޑްލްގައި ޕޯސްޓުކޮށްފައިވެއެވެ.

އެ ޕޯސްޓު ރީޕޯސްޓުކުރައްވާ ޑރ. ޖަމީލު ވިދާޅުވީ، އެއީ ކޮންމެ ފަރާތެއް ނަމަވެސް އެ ފަރާތަކުން ބުނެފައިވަނީ ވަރަށް ބޮޑު ތެދެއްކަމަށެވެ.

އެގޮތުން ރައީސް މުއިއްޒުއަށް ހީފުޅުވެގެން އުޅުއްވަނީ ޔޫރަޕުގައި ޕެޓްރޯލް ސްޓޭޝަނެއްގައި ތެޔޮއަޅާދޭން ހުރި މީހަކު ވައްޓާލި ޓިކެޓަށް މިލިއަނުން ޔޫރޯ ލޯޓަރީއެއް ލައްވާލިހެން ވެރިކަން ލައްވައިލީ ކަމަށްކަން ބަޔާންކޮށް ޑރ. ޖަމީލު ވިދާޅުވީ ތުރުކީއަށް ގޮސް ފައިދާހުރި އެއްވެސް ކަމެއް ނުކޮށް ދިވެހި ތިޖޫރީން 35 މިލިއަން ޑޮލަރ ދީފައި ޑްރޯން ހޯދާފައިވާ ކަމަށެވެ. އަދި ބޮޑަށް ޝައްކު ކުރެވެނީ ބޮޑު ކަޓަކަށް ކުރި ކަމެއް ކަމަށްވެސް އެމަނިކުފާނު ވިދާޅުވެފައިވެއެވެ.

މީގެ އިތުރުން ރައީސް މުއިއްޒު އުޅުއްވަނީ ހޫނު އެއްޗެއް އަތަށް އެޅިގެން އުޅުއްވާ ބޭފުޅަކު އުޅުއްވާ ފަދައިން ކަމަށާ އެއްވެސް ކަމެއްގައި ތެދެއް ނުހައްދަވާ ކަމަށް ޑރ.ޖަމީލު ވިދާޅުވިއެވެ.

މީގެ އިތުރުން ރައީސް މުއިއްޒުގެ ރޯލްމޮޑެލްއަކީ ބޮޑު ޖާހިލެއް ކަމަށާ އެހެންކަމުން ދެން ރައީސް މުއިއްޒުގެ ވިޝަންއާ މިޝަން ހުންނާނެ ގޮތް ދިވެހި ރައްޔިތުން ވިސްނާލުމަށް ޑރ. ޖަމީލު ގޮވާލެއްވިއެވެ.