ނިރުބަވެރިން ޣައްޒާގައި ހިންގަމުން އަންނަ ހަނގުރާމައަށް އެމެރިކާއިން 50،000 ޓަނުގެ އެކިކަހަލަ ސާމާނު ފޯރުކޮށްދީފައިވާ ކަމަށް ރިޕޯޓްތަކުން ބުނެފިއެވެ.
"ޤުދުސް" ނޫހުން ރިޕޯޓް ކޮށްފައިވާ ގޮތުގައި އެމެރިކާއިން ފޯރުކޮށްދިން 50،000 ޓަނުގެ ސާމަނުތަކަކީ މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ފޯރުކޮށްދީފައިވާ ސާމާނުތަކެވެ. އެގޮތުން އެ ހަތިޔާރުތަކުގެ ތެރޭގައި މިސައިލް، އަސްކަރީ އުޅަނދުތައް، އަދި ހަތިޔާރު ހިމެނެއެވެ.
އެމެރިކާއިން އިސްރާއީލަށް މިތަކެތި ފޯރުކޮށްދީފައިވަނީ ވައިގެ މަގުން 500 ފްލައިޓް، އަދި 107 ކަނޑުބޯޓުންނެވެ.
އެމެރިކާއަކީ އަބަދު ވެސް ފަލަސްތީނާއި ދެކޮޅަށް ހަތިޔާރު ފޯރުކޮށްދެމުން އަންނަ، ޣައްޒާގައި ހިންގަމުން އަންނަ ގަތުލުއާންމަށް ހިތްވަރު ދެމުން އަންނަ ގައުމެކެވެ. އެގައުމުން ސަހްޔޫނީންނަށް ވާގިވެރިވި ނަމަވެސް، އެގައުމުގެ ބައެއް އިދިކޮޅު ސިޔާސީ ފަރާތްތަކުން އަންނަނީ ހަނގުރާމަ ހުއްޓުވުމަށް ގޮވާލަމުންނެވެ.
އެމެރިކާއިން ހުއްޓުމެތް ނެތި ހަތިޔާރު ފޯރުކޮށްދެމުން އަންނައިރު، މި ހަތިޔާރުތައް ބޭނުން ކޮށްގެން ޣައްޒާގެ އެކި ސަރަހައްދުތަކުގައި ދިރިއުޅެމުން އަންނަ ތުއްތު ކުދިން ޝަހީދުކޮށްލާ ކަމަށް މީޑިއާ ރިޕޯޓްތަކުން ބުނެއެވެ.
މިދިޔަ އޮކްޓޯބަރު މަހުގެ 7 ވަނަ ދުވަހުން ފެށިގެން ސަހްޔޫނީން ދެމުން އަންނަ ހަމަލާތަކުގައި މިހާތަނަށް ޣައްޒާގެ 40،000 އަށްވުރެ ގިނަ މީހުން ވަނީ ޝަހީދުކޮށްލާފައެވެ.
