ގަވާއިދާއި ހިލާފަށް ރާއްޖޭގައި ފުޅާ ދާއިރާއެއްގައި ބިއުޓީ ސެލޫންގެ ވިޔަފާރި ކުރަމުން ދިޔަ ރަޖަނީ ޝްރެސްތާ (ރިޒް) ރާއްޖެ ނާދެވޭ ގޮތަށް ޑީޕޯޓުކޮށްލީ ވިސާއާ ޚިލާފުވުމުން ކަމަށް ހޯމްލޭންޑް މިނިސްޓަރު އަލީ އިހްސާން ވިދާޅުވެއްޖެވެ.

މިނިސްޓަރ އިހުސާން މިފަދައިން ވިދާޅުވެފައި ވަނީ މިއަދު އެ މިނިސްޓްރީގެ ފަރާތުން ކުރިޔަށްގެންދިޔަ ނޫސްވެރިންގެ ބައްދަލުވުމުގައިއެވެ.

އެގޮތުން އެމަނިކުފާނު ވިދާޅުވީ މިހާރު އިމިގްރޭޝަނުން ކުރިޔަށް ގެންދާ ރެއިޑްތަކުގައި  ފޯކަސް ކުރަނީ ކްރިމިނަލް ކަންކަން ކުރާ މީހުންނަށާއި، ޤަވާއިދާ ޚިލާފަށް އުޅޭ މީހުންގެ ތެރެއިން ވިޔަފާރި ކުރާ ހިންގަމުންދާ ފަރާތްތަކާއި،އާއްމު ސިއްހަތަށް ގެއްލުންވާ ގޮތަށް އަމަލު ކުރަމުންދާ ފަރާތްތަކަށް ކަމަށެވެ.

އަދި ރިޒްގެ މައްސަލައިގައި އޭނާ ޑީޕޯޓްކޮށްލީ ވިސާއާ ޚިލާފަށް ވިޔަފާރީގައި ބައިވެރިވެ ވިޔަފާރި ހިންގަމުންދާތީ ކަމަށް އިހްސާން ވިދާޅުވިއެވެ.

އިމިގްރޭޝަނުން ރިޒްއާއި އޭނާއާއެކު މަސައްކަތްކުރި 4 ބިދޭސީން ޑީޕޯޓު ކޮށްލީ މިމަހުގެ 13 ވަނަ ދުވަހު ކަމަށް ވެސް އިމިގްރޭޝަނުން ވަނީ ބުނެފައެވެ.