ފަލަސްތީނުގެ ރައްޔިތުންނާ ދެކޮޅަށް ހިންގަމުން ގެންދާ ލާއިންސާނީ އަނިޔާވެރި ޖަރީމާތަކާ ދެކޮޅަށް މެދުކެނޑުމެއްނެތި އަޑުއުފުއްލަވަމުން ގެންދެވި އަލްފާޟިލާ ޢާއިޝަތު ޝާދިޔާއާއި ޑރ.ޝަޒްރާ އިބްރާހީމް ހައްޔަރުކުރުމުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަންބޮޑުވުން ފާޅުކޮށްފިއެވެ..

އެމްޑީޕީން މިފަދައިން ބުނެފައިވަނީ އެ ޕާޓީން ނެރުނު ނޫސްބަޔާނުގައެވެ.

އެގޮތުން ހިޔާލު ފާޅުކުރުމުގެ މިނިވަންކަމަކީ ގާނޫނުއަސާސީގެ 27 ވަނަ މާއްދާގެ ދަށުން، ހަމަ ކޮންމެ މީހަކަށްމެ ކަށަވަރުކޮށްދީފައިވާ އަސާސީ ހައްގަކަށްވާއިރު، އިސްލާމް ދީނުގެ އަސްލަކާ ހިލާފުނުވާ ކޮންމެ ހިޔާލެއް ފާޅުކުރުމުގެ މިނިވަންކަން ކޮންމެ މީހަކަށްވެސް އޮންނާނެ ކަމަށް އެމްޑީޕީން ވަނީ ބުނެފައެވެ.

މި މައްސަލައިގައި ފުލުހުން ހައްޔަރުކޮށްފައިވާ ފަރާތްތަކުން ހިޔާލު ފާޅުކުރަމުން ގެންދިޔައީ ފަލަސްތީނުގެ ރައްޔިތުންގެ ހައްގުގައި ކަމަށްވާއިރު، އެ ހިޔާލު ފާޅުކުރުން ހުއްޓުވުމަކީ އެމާއްދާގެ ދަށުން ހުއްދަ އަމަލެއް ނޫންކަމަށާއި މި ސަރުކާރު އުފެދުނު ދުވަހުން ފެށިގެންވެސް ހިޔާލު ފާޅުކުރުމުގެ މިނިވަންކަމަށް އެކި ގޮތްގޮތުން ގެންދަނީ ހުރަސް އަޅަމުން ކަމަށް އެމްޑީޕީގެ ބަޔާނުގައި ވަނީ ބުނެފައެވެ.

ފަލަސްތީނުގެ ރައްޔިތުންގެ ހައްގުގައިކަމަށްބުނެ މިސަރުކާރުން ހިންގި އެއްވެސް އަމަލެއްގައި އިހުލާސްތެރިކަމެއް ނެތްކަން، މިހާތަނަށް މިސަރުކާރުން އަމަލުކޮށްފައިވާގޮތަށް ބެލުމުންވެސް ހާމަވާކަމަށާއި ފަލަސްތީނަށް އެހީ ފޮނުވުމުގައިއާއި، ބައިނަލްއަގުވާމީ މުޖުތަމައުގައި އަޑުއުފުލުމުގައިއާއި، އަދި ފަލަސްތީނުގެ ހައްގުގައި އަޅާނޭކަމަށް އިއުލާނުކުރި ފިޔަވަޅުތައް އެޅުމުގައި ވެސް މި ސަރުކާރުގެ ފުށުން ފެންނަނީ ފަހަތުފަޔަށް ބުރަވުމާއި، އިހުމާލުގެ އަމަލުތަކެއް ކަމަަށް ވިދާޅުވެ އެމްޑީޕީން ވަނީ ސަރުކާރަށް ފާޑުކިޔުން އަމާޒުކޮށްފައެވެ.

ފަލަސްތީނުގެ ރައްޔިތުންނާމެދު ދިވެހި ކޮންމެ ރައްޔިތެއްގެ ހިތުގައި އޮންނަ ހަމްދަރުދީއަކީ ދިވެހިރާއްޖޭގެ ރައްޔިތުންގެ އާންމު ޖަޒުބާތެއްކަމަށާއި އެ ޖަޒުބާތުގައި ދިވެހިރައްޔިތުންގެ ތެރެއިން ބަޔަކު ކުރާ ގާނޫނު ހުއްދަކުރާ އަމަލެއްގެ ސަބަބުން ހިފައި ހައްޔަރުކުރެވުމަކީ ބަލައިގަނެވޭނޭ ކަމެއް ނޫން ކަމަށް އެމްޑީޕީން ވަނީ ބުނެފައެވެ.

ފަލަސްތީނުގެ ހައްގުގައި އަޑުއުފުލައިގެން ހައްޔަރުކޮށްފައިވާ ޝާދިޔާއާއި ޑރ.ޝަޒްރާ ވަގުތުން ވަގުތަށް މިނިވަންކުރުމަށް ދިވެހި ސަރުކާރަށް އެމްޑީޕީން ވަނީ ގޮވާލާފައެވެ.