ރައީސް ޑރ. މުހައްމަދު މުއިއްޒުވަނީ ދިވެހި ރައްޔިތުންނަށް ޚިޔާނާތްތެރިވެވަޑައިގެންފައި ކަމަށާ ރައްޔިތުން ހިތުގައި އެކަން އެބައޮތް ކަމަށް ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ "އެކްސް"ގައި ކުރެއްވި ޕޯސްޓެއްގައެވެ.
ރައީސް އަބްދުﷲ ޔާމީނަށް ކުރަނީ އަނިޔާކަމަށް ރައީސް މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިން ވިދާޅުވިކަން ފާހަގަކޮށް ޑރ. ޖަމީލު ވިދާޅުވެފައިވަނީ، ނުފޫޒު ނުފޯރުވާނަމަ ރައީސް ޔާމީނުގެ ޝަރީޢަތެއް ނުހިނގާނެކަމަށްއިންތިޚާބުގެ ކުރިން ރައީސް މުއިއްޒު ވިދާޅުވަމުން ގެންދެވި ކަމަށެވެ.
އެހެންކަމުން މިހާރު ރައީސް ޔާމީންގެ ޝަރީއަތްތައް އަލުން ފެށުމަކީ ރައީސް މުއިއްޒުގެ ސީދާ ނުފޫޒު އޮތްކަމުގެ ދަލީލެއް ކަމަށް ޑރ. ޖަމީލު ވިދާޅުވިއެވެ. މިއަދު އިތުރަށް ޝަރީއަތް ކުރިއަށް ގެންދަނީ ލަދުވެތިކަމެއް ނެތިކަމަށާ އެއީ ރައީސް ޔާމީނަށް އަނިޔާވެރިވުމުގެ ގޮތުންކުރާކމެއްގެ ގޮތުގައި ޑރ. ޖަމީލު ސިފަކުރައްވާފައެވެ.
ރައީސް މުއިއްޒު މިއަދު ގެންދަނީ ރައީސް ޔާމީނުގެ އަދާވާތްތެރި އެންމެންނާ ޑީލް ހަދަމުންކަމަށާ ރައީސް މުއިއްޒުގެ ނިޔަތް މާކުރިން އެނގި ހާމަވެފައިވާ ކަމަށް ވެސް ޑރ. ޖަމީލު ވިދާޅުވިއެވެ.
ހުސްގޮނޑިއާ ރައީސް ޔާމީން މިނިވަން ކުރަން ވީ ވަޢުދަކީ ރައީސް މުއިއްޒަށް ރައްޔިތުން ވޯޓްލުމުގެ އަސްލު ސަބަބުކަން ފާހަގަކުރައްވާ ޑރ. ޖަމީލު އިތުރަށް ވިދާޅުވީ، ރައީސް މުއިއްޒުގެ މި ޚިޔާނާތް ރައްޔިތުން ހިތުގައި އެބައޮތް ކަމަށެވެ.
