ގައުމު އޮތް ހާލަތާ މެދު ވަޒީރުން ގެންދަވަނީ ދޮގު މައުލޫމާތު ދީ ރައީސް ޑރ. މުހައްމަދު މުއިއްޒަށް ގައުމުގެ ހާލަތު ސިއްރުކުރަމުން ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވެފައިވަނީ "އެކްސް"ގައި ކުރެއްވި ޕޯސްޓެއްގައެެވެ.
މަލީހު ވަނީ ގައުމު އޮތް ހާލަތު ޕޯސްޓުގައި ވިދާޅުވެދެއްވާފައެވެ.
އެގޮތުން ގައުމުގެ ރިޒާވް ދުވަހަކު ނުދާވަރަށް ދަށަށް ގޮސްފައިވާ ކަމަށާ ވެރިކަމަަށް 9 މަސް ފުރުނު އިރު، އެންމެ ފޮރިން އިސްވެސްޓްމަންޓެއް ނުގެނެވުނު ކަމާ ޑޮލަރުގެ އަގު ދަނީ މައްޗަށްކަންވެސް ފާހަގަކުރައްވާފައިވެއެވެ.
މީގެ އިތުރުން ގައުމުގެ އިންފްލޭޝަން ކޯންޓްރޯލްނުވާ ކަމަށާ ބޭންކުތަކުން ލޯނު ހޯދުން އުނދަގޫވެފަިއވާއިރު، އެއްވެސް ތަރައްގީގެ ޕްރޮޖެކްޓެއް ގައުމުގައި ނުހިނގާކަމަށްވެސް މަލީހު ވަނީ ވިދާޅުވެފައެވެ.
މީގެ އިތުރުން ރައީސް މުއިއްޒު ހުންނެވީ ވާނުވާގައި ކަމަށާ އިކޮނޮމިކް މިނިސްޓަރ މުހައްމަދު ސައީދު ލަންބާޗޯޅާ ވާހަކަ ދައްކަވަމުން ގެންދަވަނީ ރައީސް މުއިއްޒަށް ދޮންކަޅުވެސް އަންގާނުލައްވާ ކަމަށް ވެސް މަލީހު ވަނީ ވިދާޅުވެފައެވެ.
މަލީހު މިފަދައިން ވިދާޅުވެފައިވާއިރު، މާލީ ހާލަތު ދިރާސާ ކުރާ ފަރާތްތަކުން ބުނަމުން ގެންދަނީ ރާއްޖޭގެ ހާލަތު ވަރަސް ދަށް ކަމަށެވެ. ނަމަވެސް މާލީ ވަޒީރާ އިގްތިސޯދީ ވަޒީރު ޕްރެސްތަކުގައި ގެންދަވަނީ އެއާ ދިމާ އިދިކީލަ ވާހަކަ ދައްކަވަމުންނެވެ. އެގޮތުން ވަޒީރުން ވިދާޅުވަނީ ރާއްޖެއަށް ހާސްކަމެއް ނެތް ކަމަށެވެ.
