ރައީސުލްޖުމްހޫރިއްޔާ ޑރ.މުހައްމަދު މުއިއްޒު މީހުން ގެންގުޅެމުން ދަނީ ޓިޝޫ ގެންގުޅޭހެން ކަމަށް ވިދާޅުވެ ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ފާޑުވިދާޅުވެއްޖެއެވެ.
ހުސައިން މިފަދައިން ވިދާޅުވެފައިވަނީ، ރައީސް އަބްދުﷲ ޔާމީން އަބްދުލް ޤައްޔޫމް އަލަށް އުފައްދަވާފައިވާ ސިޔާސީ ޕާޓީ، ޕީޕަލްސް ނެޝަނަލް ފްރަންޓް ގެ ފަރާތުން ރައްޔިތުންގެ މަޖިލީހަށް ކުރިމަތިލުމަށް ޝައުގުވެރިކަން ފާޅުކުރައްވާފައިވާ ކެންޑިޑޭޓުން ތައާރަފް ކުރުމަށް ބޭއްވުނު ޖަލްސާގައި މުހާޠަބު ކުރައްވާ ވާހަކަދައްކަވަމުންނެވެ.
އެގޮތުން ހުސައިން ވިދާޅުވީ، ކުރިން އަބްދުއް ރަހީމް އަބްދުﷲ ( އަދުރޭ)، ރައީސް ޔާމީނަކީ ޓިޝޫ ގެންގުޅޭ އުސޫލުން މީހުން ގެންގުޅޭ ބޭފުޅެއްގެ ގޮތުގައި ސިފަކުރައްވާފައިވާކަމަށެވެ. އެހެންނަމަވެސް މިހާރު ފެންނަމުންދާ މަންޒަރުތަކުން ހާމަވެގެންދަނީ، އަދުރޭ މެންގެ ސަރުކާރުގެ ރައީސް، ރައީސް ޑރ.މުއިއްޒު އެފަދައިން ކަން ކުރައްވާ މަންޒަރުކަމަށް ހުސައިން ވަނީ ފާހަގަކުރައްވާފައެވެ.
މީގެ އިތުުރުން ރައީސް މުއިއްޒަކީ ފެންނަ ފެނުމަށް ހުންނަ ގޮތާއި އަމަލާއި ވަރަށް ތަފާތު ބޭފުޅެއް ކަމަށްވެސް ހުސައިން ވަނީ ސިފަކުރައްވާފައެވެ.
