ރައީސް ޑރ. މުހައްމަދު މުއިއްޒު އިންޑިއާއަށް ވަޑައިގަންނަވަނީ މާލީ ކާރިސާއިން އަރައިގަތުމަށް އިންޑިޔާގެ ފައިބުޑަށް ފައިސާގެ އެހީ ހޯދުމަށް މަޝްވަރާ ކުރަން ކަމަށް އެ ގައުމުގެ އޮފިޝަލުންނާ ހަވާލާދީ ބައިނަލްއަގުވާމީ މީޑިއާތަކުން ރިޕޯޓުކޮށްފި އެވެ.

ވަރަށް އަވަހަށް ރައީސް މުއިއްޒު އިންޑިއާއަށް ވަޑައިގަންނަވާނެ ކަމަށް ސަރުކާރުގެ އިސް ތަރުޖަމާނު ހީނާ ވަލީދު ވިދާޅުވީ ސެޕްޓެމްބަރު 10 ގަ އެވެ.


މި ދަތުރާ ގުޅިގެން "ބްލޫމްބާގް" އަދި އިންޑިއާގެ "އިކޮނޮކިމް ޓައިމްސް" ގައި އެ ގައުމުގެ އޮފިޝަލަކާ ހަވާލާދީ ބުނެފައިވަނީ، ރާއްޖެއަށް އެހީވުމުގެ ގޮތުން ރިޒާވް ބޭންކް އޮފް އިންޑިއާ އިން 400 މިލިއަން ޑޮލަރުގެ ކަރެންސީ ސްވޮޕް ފެސިލިޓީއެއް ހަމަޖެއްސުމުގެ މަސައްކަތް މިހާރު ކުރިއަށްދާ ކަމަށެވެ.

ބައިނަލްއަގުވާމީ މީޑިއާތަކަށް މައުލޫމާތު ދިން އިންޑިއާގެ އޮފިޝަލު އިތުރަށް ބުނީ ނިމިދިޔަ އެމްޑީޕީ ސަރުކާރުން އިންޑިއާއާއެކު 2019 ވަނަ އަހަރު ސޮއިކުރި 800 މިލިއަން ޑޮލަރުގެ ލައިން އޮފް ކްރެޑިޓުގެ ދަށުން ރާއްޖެއަށް ލޯނު ދޫކުރުމަކީ ވެސް އެ ގައުމުން ފޯރުކޮށްދޭން ތައްޔާރަށް އޮތް އެހީއެއް ކަމަށެވެ.

މީޑިއާ ރިޕޯޓުތައް ބުނާ ގޮތުން މުއިއްޒު ދިއްލީއަށް ވަޑައިގެން ކުރައްވާނެ އެންމެ މުހިންމު މަޝްވަރާއަކީ ފައިސާ ހޯދުމުގެ މަޝްވަރާ އެވެ.

އިންޑިޔާ އާއެކު އެފަދަ މަޝްވަރާތަކެއް ނުކުރައްވާނެކަމަށް މީގެ ކުރިން ވިދާޅުވި ނަމަވެސް މިހާރު ވަނީ ރައީސް މުއިއްޒުގެ ރާގު ބަދަލުވެފައެވެ.