ރައީސް ޑރ. މުހައްމަދުގެ ސަރުކާރަކީ އިންޒާރުގެ ސަރުކާރެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ބުރާސްފަތި ދުވަހުގެރޭ ދަ ފްރޮންޓު އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މިނިވަން ނޫސްވެރިކަމަށް ޖާގަ ދެއްވާނެކަމުގެ ވައުދާއެކު ވަޑައިގެން ރައީސް މުއިއްޒު މިހާރު ބަހާ އަމަލާ ދިމާނުވާތީ ރައީސް ޔާމީން ވަނީ އެރޭގެ ޖަލްސާގައި ކަންބޮޑުވުން ފާޅުކުރައްވާފައެވެ.

އެމަނިކުފާނު ވިދާޅުވީ، ޚިޔާލުފާޅުކުރުމުގެ މިނިވަންކަމަކީ ގާނޫނު އަސާސީއިން ވެސް ކަށަވަރު ކޮށްދޭ ހައްދަކަށްވާއިރު އެ ޙައްގަށް ވެރިންނަށްވެސް އަރައި ނުގަނެވޭނެ ކަމަށެވެ.

ނަމަވެސް މިހާރު ފެނިގެން ދަނީ ސަރުކާރުން ކުރާ ނޭދެވޭ ކަންކަން ހާމަކުރާ ނޫސްވެރިންނަށާ ނޫސްތަކަށްވެސް ފިޔަވަޅު އަޅަން މަސައްކަތްކުރާ މަންޒަރުކަމަށާ ނޫސްވެރިންނަށް އިންޒާރުދީ ފިޔަވަޅު އެޅުމަކީ ނާތަހުޒީބުކަމެއް ކަމަށް ވެސް ރައީސް ޔާމީން ވިދާޅުވިއެވެ.

އެގޮތުން ރައީސް ޔާމީން އިޝާރާތްކުރެއްވީ މަކޖިލިސް މެމްބަރުންނަށް ފައިސާ ބަހާ ވާހަކައާ ގުޅިގެން އަދަދު ނޫހުން ޑޮކިއުމެންޓްރީ ނެރުމުން ސަރުކާރުން އެ ނޫހާ މެދު ފިޔަވަޅު އެޅުމަށް ނިންމި ނިންމުމަށެވެ.

ރައީސް ޔާމީން ވިދާޅުވީ ނޫސްވެރިންނަކީ އެމީހުންނަށް ގަބޫލުކުރެވޭ ވާހަކަތަކެއް ރައްޔިތުންގެ ސަމާލުކަމަށް އަދި އޭގެތެރެއިން ސަރުކާރުގެ ސަމާލުކަމަށް ގެންނަ ބައެއްކަމަށެވެ. އެހެންކަމުން ނޫހުގައި ރިޕޯޓް ކުރާ ވާހަކައަކީ އޭގެ ޒާތުގައި އަލިފުން ޔާއަށް ތެދުވާހަކައަކަށް ވާކަށް ނުޖޭ ކަމަށާއި އަދި މަސްދަރު ހާމަކުރާކަށް ވެސް ނުޖެހޭނެކަމަށް ރައީސް ޔާމީން ވިދާޅުވިއެވެ.

ނޫސްވެރިިކަމަކީ ކޮބައިކަން ހާމަކޮށްދެއްވަމުން ރައީސް ޔާމީން ވިދާޅުވީ ގައުމީ ސަލާމަތައް ނުރައްކާވާ ކަންކަމުގައިޔާއި ނޫނީ ނަފްރަތު އޭގައި ހިމެނޭ ވާހަކަ ދައްކާ ޓެރަރިޒަމް އަށް މަގުފަހިވާ ކަންކަން ނޫހަކުން ޝާއިއުކުރާ ޚަބަރެއްގައި ހުރެގެން ނޫނީ މިނިވަން މުޖްތަމައެއްގައި ފިޔަވަޅު އަޅާ ހިސާބަށް ނުދާކަމަށެވެ.