ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ ސައްތައިން ސައްތަ މުސްލިމް ގައުމެއްގެ ވެރިޔެކެވެ. އެހެންނަމަވެސް އދ ގެ އާންމު މަޖިލީހުގައި ދުނިޔޭގެ ގައުމުތަކުގެ ވެރިންގެ ކުރިމަތީ ހުއްޓިހުރެ އަމިއްލައަށް ބޮޑު ލަދެއްގައި ބެދުނު އިރުވެސް ނޭނގުނެވެ. ތިމަންމަނިކުފާނަށް ހުއްޓިހުރެ ވާހަކަ މިދެއްކެނީ ކޮންބަޔަކާ މުހާތަބުކޮށް ކަމެއް ވެސް ރައީސް މުއިއްޒަކަށް ނޭނގުނެވެ.

ފަލަސްތީނަކީ މިނިވަން މުސްތަގިއްލު ދައުލަތެއްގެ ގޮތުގައި އދ އިން ބަލައިނުގަނެ އޮންނަނީކީ ހިތްވަރު ނެތިގެނެއް ނޫނެވެ. އެކަންކަން ނުވެ އެ އޮންނަނީ އާރާބާރު ހުރި ގައުމުތަކުން ކުރަން ބޭނުން ނުވާތީއެވެ. މިވަރު ރައީސް މުއިއްޒަށް ނޭނގުމުން ދެން ބުނަން ޖެހޭނީ "ވަﷲ އައުލަމް" މިފަދައިންނެވެ.

ހަމަގައިމުވެސް އެމެރިކާއާއި އިގިރޭސިވިލާތާއި ޗައިނާއާއި ރަޝިޔާއާއި ފަރަންސޭސިވިލާތުން ބޭނުންވެއްޖެނަމަ ފަލަސްތީނުގައި ހިނގަމުން އެ އަންނަ ގަތުލުއާންމު ހުއްޓުމަކީ ސިކުންތެއްގެ ކަމެކެވެ. ފަލަސްތީނަށް އދ ގައި ފުރިހަމަ މެންބަރޝިޕް ދިނުމަކީވެސް އެހާމެ ފަސޭހައިން ކުރެވޭނެ ވަރުގެ ކަމެކެވެ. އެކަންތައް ނުކުރަން އެ ތިބެނީ ފަލަސްތީނު މިނިވަން ނުކުރުމާއި ފަލަސްތީނުގެ ގަތުލުއާންމަށް ތަރުހީބުދިނުމަށްޓަކައެވެ.

އެހެންކަމުން ބަސްނުވިކޭ އޮޑިއެއްގެ ދިރުބަލަށް އަރާހުރެ ރައީސް މުއިއްޒު ދައްކާ ވާހަކައަކުން އެ މީހުނަށް ކަހަރުވަކެކޭވެސް ހީނުވާނެއެވެ. ރައީސް މުއިއްޒު ފަލަސްތީނޭ، ޣައްޒާއޭ ކިޔައިގެން ކުޅުނީ ޑްރާމާއެއްކަން ދުނިޔޭގެ ގައުމުތަކުގެ ވެރިންނަށް ހާމަވެއްޖެއެވެ. ދިވެހި ރައްޔިތުންގެ ލޮލުގައި އަނދުނެއް އަޅުވަން ކުޅެލި ޗަރުކޭހެއްކަން އެންމެނަށް އެނގި ނިމިއްޖެއެވެ. ދުނިޔެއަށް އެ ދައްކައިދިނީ ރައީސް މުއިއްޒު ކަހަލަ އޮޅުވާލާ ދޮގު ހަދާ ވެރިންގެ ހަގީގީ ސިފައެވެ.

ފަލަސްތީނުގައި ހިނގަމުންދާ ގަތުލުއާންމު ހުއްޓުވުމާއި އދ ގައި ފަލަސްތީނަށް ގައުމެއްގެ ފުރިހަމަ ހައިސިއްޔަތު ދިނުމުގެ ހިތްވަރު ހުންނަން ޖެހޭނެ ކަމަށް ރައީސް މުއިއްޒު ވިދާޅުވާއިރު ރައީސް މުއިއްޒުގެ ފިނޑިކަން އެ އެންމެންނަށްވުރެ މާބޮޑެވެ.

ވާނީވެސް އެހެންތާއެވެ. އދ އަށް ދާންދިޔަ މަގުމަތީވެސް ސަހްޔޫނީންނަށް ވާގިވެރިވާ ކުންފުންޏެއްގެ އުފެއްދުމެއްކަމަށްވާ "ކޮސްޓަރ" ބްރޭންޑްގެ ކޮފީއެއް ބޯލައިގެން އިސްތިހާރުކޮށްލީއެވެ. ނުވީތާކަށް ސަހްޔޫނީންގެ ޕާސްޕޯޓް މަނާނުކޮށް ޕިޖަން ހޯލްގައި އެ މައްސަލަ ބާއްވައިގެން އުޅޭތާ ލައްކަ ދުވަސްވެއްޖެއެވެ.

އެކަން ކުރުމުގެ ހިތްވަރުނެތް ފިނޑިއަކު ތެދުވެ ޣައްޒާއޭ ފަލަސްތީނޭ ކިޔައިގެން އދ ގައި ތަގުރީރު ކުރެއްވުމަކީ ފަލަސްތީނު ރައްޔިތުންނަށް ކުރި ފުރައްސާރައެކެވެ. މަލާމާތެކެވެ. އެ މައުސޫމް އަހުންނާއި އުހުތުންގެ މޫނުމަތީ ޖެހި ތަފާއްޔެކެވެ. ދިވެހި ރައްޔިތުންނަށް އޮޅުވާލާ އޮޅުވާލުމެކެވެ. ނަތީޖާއެއް ނެތް އެ ވާހަކަތަކުން ފާޅުވީ ރައީސް މުއިއްޒުގެ މަކަރުވެރިކަމެވެ.

ރައީސް މުއިއްޒެވެ. އދ ތަގުރީރުކުރައްވަން ލިބިވަޑައިގެންނެވި ފުރުސަތުގައި ފަލަސްތީނުގެ ރައްޔިތުންގެ ހައްގުގައި އަޑުއުފުލުމުން އުފާވިއެވެ. ނަމަވެސް އެގޮތައް ތަގުރީރު ކުރެއްވުމުގެ ކުރިން އެ ރައްޔިތުންގެ ހައްގުގައި ސަހްޔޫނީންނަށް ވާގިވެރިވާ ކުންފުނިތަކުގެ އުފެއްދުން ރާއްޖެ އެތެރެކުރުން މަނާކޮށް ސަހްޔޫނީންގެ ޕާސްޕޯޓް މަނާކުރި ނަމަ މިއަދު ރާއްޖޭގެ ރައްޔިތުން މަނިކުފާނާ މެދު ފަހުރުވެރިވާނެއެވެ. މުސްލިމް އެހެން ގައުމުތަކުގެ ވެރިންނަށް މަނިކުފާނާ ދިމާލަށް އިނގިލި ދިއްނުކުރެވުނީހެވެ.އދ ގެ ފިނޑިކަން ދެއްކެވި ވާހަކައަކުން ހާމަވެގެން މިދިޔައީ ރައީސް މުއިއްޒުގެ ފިނޑި މިންވަރެވެ.