ރައީސް ޑރ މުހައްމަދު މުއިއްޒު އަވައްޓެރި ގައުމު އިންްޑިޔާއަށް ސަލާން ޖެހުމަށްޓަކައި ވަޑައިގަންނަވަނީ އަންނަ މަހުގެ 7 ގައި ކަމަށް އެ ގައުމުގެ މީޑިޔާތަކުން ރިޕޯޓްކޮށްފިއެވެ.

ރައީސް މުޢިއްޒު ވަރަށް އަވަހަށް އިންޑިޔާ އަށް ދަތުރުފުޅެއް ކުރައްވަން ހަމަޖެހިފައިވާ ކަމަށް ރައީސް އޮފީހުން ހާމަކުރީ މި މަހުގެ 10 ވަނަ ދުވަހުއެވެ.އެހެން ނަމަވެސް އެ ދަތުރުފުޅު ކުރައްވާނެ ތާރިހެއް ފައިނަލް ނުވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވަނީ ވިދާޅުވެފައެވެ.

އެހެންނަމަވެސް އިންޑިއާގެ ހިންދުސްތަން ޓައިމްސް އިން ބުނީ ރައީސް މުއިއްޒު އިންޑިއާއަށް ވަޑައިގެންނެވުމަށް ހަމަޖެހިފައިވަނީ އަންނަ މަހުގެ 7 ވަނަ ދުވަހުން 9 ވަނަ ދުވަހަށެވެ. އަދި އަންނަ މަހުގެ 8 ވަނަ ދުވަހު އިންޑިއާގެ ބޮޑު ވަޒީރާއެކު، ރައީސް މުއިއްޒު މަޝްވަރާތައް ބޭއްވެވުމަށް ހަމަޖެހިފައިވާ ކަމަށްވެސް އެ ނޫހުގައިި ވަނީ ބުނެފައެވެ.

އެގޮތުން އިންޑިޔާ ހިންދުސްތަން ޓައިމްސްގައި ރިޕޯޓްކޮށްފައިވާ ގޮތުގައި މި ދަތުރުފުޅުގައި ދެ ޤައުމުގެ ދެމެދުގައިވާ ހާރިޖީ ގުޅުން އިތުރަށް ވަރުގަދަ ކުރުމަށް މަޝްވަރާތައް ކުރިއަށްގެންދިއުމަށް ވަނީ ހަމަޖެހިފައެެވެ. އަދި އޭގެއިތުރުން ރާއްޖޭގެ މާލީ ހާލަތުން އަރައިގަތުމަށް، އިންޑިއާއިން ވެދެވެން އޮތް އެހީތެރިކަމާއި ގުޅޭގޮތުން ދިވެހި ސަރުކާރުން ހުށަހެޅުންތަކެއް، އިންޑިއާ ސަރުކާރަށް ހުށަހަޅާނެކަމަށް ބެލެވޭކަމުގައި އެ ނޫހުގައި ބުނެފައިވެ އެވެ.

އިންޑިޔާއަށް ރައީސް މުއިއްޒު ވަޑައިގަންނަވަން ހަމަޖެހިފައި ވަނީ ރާއްޖޭގެ މާލީ ހާލަތު ގޯސްވުމުން ސަލާން ޖެހުމައްޓަކައި ކަމަށް އެ ގައުމުގެ ބައެއް ފަރާތްތަކުން ވެސް އަންނަނީ ބުނަމުންނެވެ.