ދ.ހުޅުދެލި މެޖިސްޓްރޭޓް ކޯޓުގެ ވަޒީފާއަކަށް ކުރިމަތިލައި ކުރި އިންޓަވިއުގައި، މޫނު ބުރުގާ އަޅާފައި ހުރުމުން ކަމަށް ބުނެ އިންޓަވިއު މަރުހަލާގައި ޑިސްކޮލިފައި ކުރި ފަރާތުން ރައީސް އޮފީހަށް ފޮނުވި ޝަކުވާ ސިޓީގެ ޖަވާބު އަދިވެސް ނުލިބޭ ކަމަށް ބުނެ އެ ފަރާތުން ސޯޝަލް މީޑިޔާގައި ނުުރުހުން ފާޅުކޮށްފިއެވެ.

އާއިލާއިން ހާމަކޮށްފައިވާ ގޮތުގައި އެ މައްސަލަ ދިމާވުމާއި ގުޅިގެން ރައީސް މުއިއްޒު އެކްސް އެކައުންޓްގައި މޫނު ބުރުގާ އަޅާ ފަރާތްތަކަށް އެއްވެސް ތަފާތުކުރުމެއްނެތި ވަޒީފާގެ ފުރުސަތުތައް ފަހިވެގެންދާނެ ކަމަށް ވިދާޅުވުމުން ވަރަށް ބޮޑު އުއްމީދެއް ލިބިގެންދިޔަ ކަމަށެވެ. ނަމަވެސް ނަތީޖާ ޝީޓަށް އެއްވެސް ބަދަލެއް ނާންނަ ކަމަށް އެ ފަރާތުންވެސް މައުލޫމާތުދެއެވެ.

މީގެ އިތުރުން، ރައީސްގެ މި ޕޯސްޓާއި ގުޅިގެން ޑިޕާޓްމަންޓް އޮފް ޖުޑިޝިއަލް އެޑްމިނިސްޓްރޭޝަންއަށާއި، ހުޅުދެލި މެޖިސްޓްރޭޓް ކޯޓަށާއި ރައީސް އޮފީހަށްވެސް ސިޓީ ފޮނުވާފައިވާ ކަމަށް މައުލޫމާތު ލިބިފައިވެއެވެ.

ނަމަވެސް، މި އިން އެއްވެސް އިދާރާއަކުން އެ ފަރާތަށް ޖަވާބެއް ދީފައިނުވާ ކަމަށް ބުނެފައިވެއެވެ.

ކޮންމެ މައްސަލައެއް ދިމާވުމުން ރައްޔިތުންގެ ޕްރެޝަރ އާއި ހެދި ޕޯސްޓެއް ޖަހާލުން ފިޔަވާ އިތުރު ފިޔަވަޅެއް މި ސަރުކާރުން ނަގަމުންދާތަނެއް ނުފެނެއެވެ.