އިލްމެއް ނެތް ބަޔަކާ އެކު ބައިއަތު ހިފާ ރައީސް މުހައްމަދު މުއިއްޒު ގައުމުގެ އުއްމީދުގައި ކޮޅުފައިން ޖަހައިފި ކަމަށް ކުރީގެ ނައިބު ރައީސް، ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ޑރ.ޖަމީލުވަނީ އެމަނިކުފާނު ރައީސް އަބްދުﷲ ޔާމީނާ އެކު ހުންނެވި ފޮޓޯއެއް ހިއްސާކުރައްވާ ޅެން ބައިތަކުން މެސެޖެއް ދެއްވާފައެވެ.

އެގޮތުން މިތުރުންގެ ހިތަށް ދަތިކުރި ކަޅު ކޮންމެ ރެއެއް ވެސް، ފިތުރަތުގެ އުސޫލުން ނިމެނީ ފަތިހަށޭ އަމުދުން ޝާއިރު ބުނެފައިވާއިރު އެކަންކަން ހަނދާނުގައި ނުބަހައްޓާ 2023 ގައި މި ޙަގީގަތުގައި ކޮޅުފައިން ޖަހައި ތަޖްރިބާއެއް ނެތް، ޢިލްމެއް ނެތް ބަޔަކާއިއެކު ރައީސް މުއިއްޒު ގޮންޖެހީ ދިވެހި ގައުމުގެ އުއްމީދުކަމުގައިވާ ރައީސް ޔާމީނަށް ކަމަށް ޑރ. ޖަމީލު ވިދާޅުވިއެވެ.

ނަމަވެސް ބައެއްގެ އެ ނުބައި ރޭވުންތައް ފުނޑުފުނޑުވަމުންދާ ކަމަށް ޑރ. ޖަމީލު ވަނީ ވިދާޅުވެފައެވެ.

ބެލެވޭ ގޮތުގައި ޑރ. ޖަމީލު އެ އިޝާރާތްކުރެއްވީ ގައުމުގެ މަތި ފަޑިއަސް ބޮޑެތި ބަދަލުތަކެއް ރައީސް މުއިއްޒު ގެންނަވަމުންދާ ދިއުމަށެވެ. އަދި ގައުމުގެ ކަންކަން މެނޭޖުނުކުރެވި ބޮއްސުންލަމުންދާ ދިއުމަށެވެ.