ގައުމިއްޔަތު ކުރިއެރުވުމާއި އާލާކުރުމުގެ ނަމުގައި ހުސް ވާހަކަ ދެއްކުން ފިޔަވައި މި ސަރުކާރަށް ކުރެވުނު އެއްވެސް ކަމެއް ނެތް ކަމަށް ކުރީ ސަރުކާރުގައި ހެރިޓޭޖު މިނިސްޓްރީގެ ސްޓޭޓް މިނިސްޓަރުކަން ކުރެއްވި މުހައްމަދު ތޯރިގު ވިދާޅުވެއްޖެ އެވެ.

ތޯރިގު މިފަދައިން ވިދާޅުވެފައި ވަނީ އިދިކޮޅު އެމްޑީޕީއިން ކޮންމެ ހޯމަ ދުވަހެއްގެ ރޭ ބާއްވަމުންދާ "ހަވަރު ބެރު" ޕެނަލް ޑިސްކަޝަންގައި ވާހަކަދައްކަވަމުންނެވެ.

އަންނަން އޮތް ޖީލުތައް ބިނާކުރެވޭނީ ސްކޫލްތަކުގެ ތެރެއިން ކަމަށާއި ނަމަވެސް މި ސަރުކާރުން ގައުމިއްޔަތު ދިރުވުމަށް އެޑިއުކޭޝަން މިނިސްޓްރީއާ އެކު ކުރަމުންދާ މަސައްކަތްތައް ބުނެ ނުދެވޭ ކަމަށް ތޯރިގު ވިދާޅުވި އެވެ.

ތޯރިގު އިތުރަށް ވިދާޅުވީ ވަރުގަދަ ގައުމިއްޔަތެއް އުފައްދަން ޖެހޭ ކަމަށާއި ނަމަވެސް އެ މަގަށް ސަރުކާރުން ކަން ކުރަމުން ނުދާ ކަމަށް އޭނާ ވިދާޅުވި އެވެ.

ރައީސް ޑރ. މުހައްމަދު މުއިއްޒު ރާއްޖެއަށް ގެންނަން އުޅުއްވާ ގައުމިއްޔަތު ވިސްނައިދީފައި އޮތް ގޮތަށް ނުގެނެވޭ ކަމަށާއި ނަމަވެސް އެކަންކަން ކުރިއަށްދާ ކަމަށް ރައީސަށް މިނިސްޓްރީން ވިސްނައިދީފައިވާ ކަމަށް ތޯރިގު ވިދާޅުވި އެވެ.