އިސްލާމީ ބޮޑެތި ގައުމުތައް ކަމަށްވާ ފަލަސްތީން، ޔަމަން، ލުބްނާން ފަދަ ގައުމުތަކަށް ސަހްޔޫނީން ބޮން އަޅާ ސުންނާފަތި ކުރަމުންދާއިރު، މި ހަމަލާތަކަށް ހިތްވަރުދީ އެންމެ ގަދަޔަށް އަތް ޖަހަމުންދާ ބަޔަކީ އިންޑިއާ ކަމަށާއި ދިވެހިރާއްޖޭގެ ސަރުކާރުން އަދިވެސް މަސައްކަތްކުރަނީ އިންޑިއާ އާއި ގުޅުން ބަދަހިކުރުމަށް ކަމަށް ރައީސް ޔާމީން އަބްދުލް ގައްޔޫމް ވިދާޅުވެއްޖެއެވެ.

ޕީއެންއެފްގެ ފްރޮންޓް އޮފީސް ޖަލްސާގައި ރޭ ވާހަކަދައްކަވަމުން އެމަނިކުފާނު ވިދާޅުވީ މުސްލިމް ގައުމުތަކާއި ދެކޮޅަށް ސަހްޔޫނީން ހިންގަމުންދާ ގަތުލުއާންމު ހަމައެކަނި ކުށްވެރިކުރުމުން ނުފުދޭ ކަމަށެވެ.

މިގޮތުން، މި ހަމަލާތައް ކުށްވެރިކޮށް ވާހަކަދައްކަވާތީ ރައީސް މުއިއްޒުއަށް ޝުކުރު ދަންނަވާ ހާލު އެމަނިކުފާނު އިތުރަށް ވިދާޅުވީ 79 ވަަނަ އދ ގެ ބައްދަލުވުމުގައި ސަހްޔޫނީންގެ ރައީސް ބެންޖަމިން ނަތަންޔާހޫ ވާހަކަދައްކަވަން ފެއްޓެވުމުން "އިބިލީހުގެ ދަރިންނަށް" ވުރެ ލަހުން ދިވެހި ސަރުކާރުގެ ވަފުދު ޖަލްސާ ދޫކޮށް ނުކުތުމަކީ ހިތާމަހުރި ކަމެއް ކަމުގައެވެ.

ސަހްޔޫނީންނަށް އެންމެ ގަދަޔަށް ވާގިވެރިވަނީ އިންޑިއާކަމަށާއި މި ހަމަލާތަކަށް އެންމެ ބޮޑަށް މަރުހަބާ ކިޔާފައިވަނީ އިންޑިއާގެ ބޮޑުވަޒީރު ނަރެންދަރަ މޯދީ ކަމަށް ރައީސް ޔާމީން ފާހަގަކުރެއްވިއެވެ.

އިންޑިއާ އާއި ރާއްޖެ އަދިވެސް ގުޅުން ބަދަހި ކުރުމުގެ މަސައްކަތް ކުރައްވަމުން ގެންދާތީ އެމަނިކުފާނު ވަނީ ވަރަށް ބޮޑަށް އެކަމަށް ފާޑުވިދާޅުވެފައެވެ.