ރާއްޖެ އިސްލާމްވިތާ 898 ވަނަ އަހަރު ފުރުން ފާހަގަކުރުމަށް ޕީޕަލްސް ނެޝަނަލް ފްރޮންޓް (ޕީއެންއެފް) ގެ ފަރާތުން ޕެނަލް ޑިސްކަޝަނެއް ބާއްވަން ނިންމައިފިއެވެ.

މިކަމާ ގުޅިގެން ތޭރައޮންލައިން އަށް މައުލޫމާތު ދެއްވަމުން ޕީއެންއެފް އިން ބުނީ މި ޕެނަލް ޑިސްކަޝަން އަކީ އެ ޕާޓީގެ އިޖްތިމާއީ ކޮމިޓީއިން އިސްނަގައިގެން ބާއްވާ ޕެނަލް ޑިސްކަޝަނެއް ކަމަށެވެ.

މި ޕެނަލް ޑިސްކަޝަންގައި ތިއްބަވަނީ ޑރ. ނަސްރުﷲ މުސްތަފާ، އަލީ ރަޝީދު އަދި އޭގެއިތުރުން އާދަމް ޒާހިރެވެ.

މި ޕެނަލްގައި އާންމުންނަށް ބައިވެރިވެ ސުވާލުކުރުމުގެ ފުރުސަތު އޮންނާނެ ކަމަށް ޕިއެންއެފުން ހާމަކޮށްފައިވެއެވެ. ޕެނަލް ޑިސްކަޝަން އޮންނާނީ ޕީއެންއެފް އޮފީހުގައި މިރޭ 8:45 ގައެވެ. މި އިވެންޓު ޗެނަލް13 އިން ލައިވް ކުރާނެއެވެ.

ތާރީޚުގެ ފަތްފުއްތަކުން އެނގެން އޮތް ގޮތުގައި ރާއްޖެ އިސްލާމްވީ ހިޖުރައިން 548 ވަނަ އަހަރުގެ ރަބީޢުލް އާޚިރު މަހުގެ 2ވަނަ ދުވަހުއެވެ. އެއީ މީލާދީން 1153 ވަނަ އަހަރުގެ ޖޫން މަހުގެ ތެރޭގައެވެ. ރާއްޖޭގައި މީހުން ވަޒަންވެރިވެގެން އުޅެންފެށީއްސުރެ އަޅުކަން ކުރަމުންއައި އެހެން ދީންތައް ދޫކޮށްލާ ދިވެހި ދައުލަތުން ރަސްމީކޮށް އިސްލާމް ދީން ޤަބޫލުކުރީވެސް އެދުވަހު ކަމަށް ތާރީޚުން ހެކިދެއެވެ.

ރާއްޖެ އިސްލާމް ކުރެއްވީ މަޣްރިބް ކަރައިގެ ބޭފުޅެކޭ ބުނާ އަޑު އަޅުގަނޑުމެން އެންމެ ކުރީއްސުރެވެސް އަހަމު. ތާރީޚުންވެސް އެނގޭ ގޮތުގައި ރާއްޖެ އިސްލާމް ކުރެއްވި ބޭކަލަކީ އިސްލާމް ދީނަށް ގިނަ ޚިދުމަތްތަކެއް ކުރެއްވި މަޣްރިބް ކަރައިގެ ޢިލްމުވެރިޔާ އަބުލް ބަރަކާތު ޔޫސުފުލް ބަރުބަރީއެވެ. ހިޖުރައިން 548 ވަނަ އަހަރު ރާއްޖެ އިސްލާމްވި ނަމަވެސް މިދުވަސް ރަސްމީކޮށް ފާހަގަކުރަން ފަށާފައިވަނީ އައްސުލްޠާން މުޙައްމަދު ފަރީދުލްއައްވަލްގެ ރަސްކަމުގައި ހިޖުރައިން 1374 ވަނަ އަހަރުއެވެ. އެއަށްފަހު މިދުވަސް ފާހަގަކުރުން ސަރުކާރުން ހުއްޓަވާލެއްވުމަށްފަހު 33 އަހަރު ފަހުން އަނެއްކާވެސް ވަނީ ރަސްމީކޮށް މިދުވަސް ރާއްޖޭގައި ފާހަގަކުރަން ފަށާފައެވެ.

އެއީ ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމްގެ ވެރިކަމުގެ 5 ވަނަ ދައުރުގައެވެ. އޭރު މިދުވަސް ފާހަގަކުރީ ރާއްޖެއަށް ނަޞާރާ ދީން ފެތުރުނަ ނުދިނުމަށް ކުރަމުންދިޔަ މަސައްކަތުގެ ތެރެއިންނެވެ. މިގޮތުން ރާއްޖެ އިސްލާމްވި ދުވަސް ދަޢުލަތުން ރަސްމީކޮށް ފާހަގަކުރަން ފެށީ ދިވެހީންގެ ހިތްތަކުގައި އިސްލާމް ދީނަށް އޮތް ލޯބި ހާމަކޮށްދިނުމުގެ އިތުރުން އެދުވަސްވަރު ރާއްޖޭގައި ފެތުރިފައިވާ އެކި ދީންތަކުގެ ފިކުރާއި ވިސްނުމުން ދުރުހެލި ކުރުމުގެ މަޤްސަދުގައެވެ.