މި އަންނަ ހުކުރު ދުވަހުގެރޭ ޗެނަލް 13 އިން ދުރަށް ދެއްކުމަށް ނިންމާފައިވާ "ބެލްކަނީ ޑޮކިއުމެންޓްރީއާ ގުޅިގެން ބްރޮޑްކޮމުއިން ނަސޭހަތުގެ ސިޓީއެއް އެ ޓީވީ ސްޓޭޝަނަށް ފޮނުވައިފިއެވެ.
މިކަމާ ގުޅިގެން ޗެނަލް 13 ގެ ސީއީއޯ އިސްމާއިލް ސޮފްވާން ވިދާޅުވީ، މި ޑޮކިއުމެންޓްރީއާ ގުޅިގެން ބްރޮޑްކޮމްއިން އެ ޓީވީ ސްޓޭޝަނަށް ފޮނުވި ސިޓީގައިވަނީ އޮގަސްޓު މަހުގެ 14 ވަނަ ދުވަހު އިމާރާތެއްގެ މަތިން ވެއްޓި ނިޔާވީ ޒުވާނާގެ މަރާ ގުޅިގެން ޗެނަލް 13އިން ދުރަށް ދެއްކުމަށް ނިންމާ އިޝްތިހާރު ކުރަމުން އަންނަ "ބެލްކަނީ" ޑޮކިއުމެންޓްރިއާ ގުޅިގެން އާއިލާގެ ފަރާތުން ދިވެހި ފުލުހުންގެ ހިދުމަތަށް ކަންބޮޑުވުން ފާޅުކޮށް މައްސަލައެއް ހުށަހަޅާފައިވާތީ އެކަން އެ މުއައްސަސާއިން ބްރޮޑްކޮމްގެ ސަމާލުކަމަށް ގެނެސްފައިވާ ކަމަށެވެ.
އެހެންކަމުން އެފަދަ ޚައްސާސް މައްސަލައެއް ބްރޮޑްކާސްޓުކުރާއިރު، ބްރޮޑްކާސްޓު ކުރުމުގެ ގާނޫނާ އެތިކްސްއާ ޚިލާފުނުވާނެހެން ބްރޮޑްކާސްޓުކުރުމަށް ނަސޭހަތްތެރިވެފައިވެއެވެ.
"ބެލްކަނީ" ޑޮކިއުމެންޓްރީއަކީ 14 އޮގަސްޓުގައި ނިޔާވި ވިފާގު އިބްރާހިމު އަދުނާނުގެ މަރާ ގުޅިގެން ގެނެސްދިނުމަށް ހަމަޖެހިފައިވާ ޑޮކިއުމެންޓްރީއެއް ކަމަށް ޗެނަލް 13 ގެ މެނޭޖުމަންޓުން "ތޭރަ އޮންލަން"އަށް މައުލޫމާތު ދީފައިވެއެވެ.
