ޗެނަލް 13 އިން އޮންއެއަރ ކުރި "ބެލްކަނި" ޑޮކިޔުމެންޓަރީ އިތުރަށް ނުދެއްކުމަށް މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އަންގައިފިއެވެ.
އެގޮތުން ޗެނަލް 13 ގެ ސީއީއޯ އިސްމާއިލް ސޮފްވާން ވިދާޅުވީ ބްރޯޑްކޮމް އިން އެގޮތައް އެ ޑޮކިޔުމެންޓަރީ ދެއްކުން ހުއްޓުވާފައި ވަނީ ފޮނުވި ސިޓީއެއްގައެވެ. އެގޮތުން އެ ސިޓީގައި ބުނެފައި ވަނީ 7 އޮކްޓޯބަރު 2024 ވަނަ ދުވަހުގެ ރޭ ޗެނަލް 13 އިން ދުރައް ދެއްކި އެ ޑޮކިޔުމެންޓަރީ ދެން އިތުރަށް ނުދެއްކުމަށެވެ.
އަދި އޭގެއިތުރުން ޗެނަލް ގެ ސޯޝަލް މީޑިޔާގެ ޕްލެޓްފޯމްތަކުން ޑޮކިޔުމެންޓަރީ ނެގުމަށް ވެސް ވަނީ ބުނެފައެވެ.
ބްރޯޑްކޮމް އިން ޚައްސާސް މައްސަލައެއް ބްރޮޑްކާސްޓުކުރާއިރު، ބްރޮޑްކާސްޓު ކުރުމުގެ ގާނޫނާ އެތިކްސްއާ ޚިލާފުނުވާނެހެން ބްރޮޑްކާސްޓުކުރުމަށް ނަސޭހަތްތެރިވެފައިވާތީ ޗެނަލް 13 ގެ ފަރާތުން ވަނީ ބްރޯޑްކާސްޓް ކުރި އިރު އެކަންކަމަށް ސަމާލުވެސް ވެފައެވެ.
ބްރޯޑްކޮމް އިން ބޭއްވި ބައްދަލުވުމުގައި އިތުރަށް ނިންމާފައިވަނީ އެ ކޮމިޝަނުން ވަކިއެއްޗެއް އަންގަންދެން "ބެލްކަނި" ޑޮކިޔުމެންޓަރީ ރައްކާކޮށްފައި ބެހެއްޓުމަށެވެ. އަދި އެ މައްސަލަ ވަރަށް އަވަސް މައްސަލައެއްގެ ގޮތުގައި ބަލަމުން އަންނަ ކަމަށް ވެސް އެ ކޮމިޝަނުން އެ ޓީވީ ސްޓޭޝަނަށް ފޮނުވި ސިޓީގައި ވަނީ ބުނެފައެވެ.
"ބެލްކަނީ" ޑޮކިއުމެންޓްރީއަކީ 14 އޮގަސްޓުގައި ނިޔާވި ވިފާގު އިބްރާހިމު އަދުނާނުގެ މަރާ ގުޅިގެން ޗެނަލް 13 ގެ އިންވެސްޓިގޭޝަން ޓީމުން ހަދާފައިވާ ޑޮކިޔުމެންޓަރީއެކެވެ.
