އިންޑިއާގެ އަސްކަރީ އުޅަނދުތައް ދިވެހިރާއްޖެއަށް ގެނައުމަށް މި ސަރުކާރުން އެއްބަސްވުމާއި ގުޅިގެން ކުރީގެ ނައިބު ރައީސް އަދި ޕީއެންއެފްގެ އިސް ސަފުގައި މަސައްކަތްކުރައްވާ ޑރ މުހައްމަދު ޖަމީލް އަހްމަދު ފާޑު ވިދާޅުވެއްޖެއެވެ.

ރާއްޖޭގައި އިންޑިއާގެ އަސްކަރީ އުޅަނދު އޮޕަރޭޓް ކުރުން ހުއްޓާލައި، އެގައުމުގެ ސިފައިން ފޮނުވައިލަން ވީ ވައުދާ ހިލާފަށް، އެގައުމުގެ އަސްކަރީ އުޅަނދުތަކެއް ގެންނަން ސަރުކާރުން އެއްބަސްވުމުން މިހާތަނަށް ޕީއެންސީ އިންނާއި މުއިއްޒު ވަކާލާތު ކުރަމުން އައި ގައުމިއްޔަތު ވަރަށް ރަނގަޅަށް ހާމަވެގެން ގޮއްސި ކަމަށް ޖަމީލް ވަނީ ވިދާޅުވެފައެވެ.

ޖަމީލް އެކްސްގައި ކުރެއްވި ޕޯސްޓެއްގައި އިތުރަށް ވިދާޅުވެފައިވަނީ މުއިއްޒު ވަނީ ދިވެހިންގެ ފަޚުރާއި ޝަރަފު ވެއްޔާއި މޮޑެލައިފިކަމަށެވެ.

މިދިޔަ ސަރުކާރުން ރާއްޖޭގެ ކަނޑުގެ ސަރަހައްދުގެ ބަޔެއް އިންޑިއާއަށް ދޫކޮށްލި މައްސަލައާއި، އިންޑިއާ ސިފައިންގެ މައްސަލައިގައި އެންމެ އަޑުގަދަ ކުރި މީހުން ވެރިކަމަށް އައިސް ގައުމުގެ މިނިވަންކަމާއި އިސްތިގުލާލު ދޫކޮށްލައިފި ކަމަށް ޖަމީލް ސިފަކުރެއްވިއެވެ.

މީގެ އިތުރުން، މުއިއްޒު އާއި އަޅާ ބަލާއިރު ކުރީގެ ރައީސް އިބްރާހިމް މުހައްމަދު ސާލިހް ވެސް ދިވެހިިންގެ ކުރިމަތީ ހީރޯއަކަށް ވެއްޖެ ކަމަށް ޖަމީލް ވިދާޅުވިއެވެ.

މުއިއްޒު ދިވެހިންގެ ނަމުގައި ކަމަށް ބުނެ އިންޑިއާ އަށް ސަލާންޖެހުމުން އޭގެ އަގު އަދާ ކުރަން މި ޖެހުނީ ދިވެހިންގެ މިނިވަންކަމުންނެވެ.