އިންޑިއާގެ އަސްކަރީ އުޅަނދުތައް އޮޕަރޭޓް ކުރުން ހުއްޓާލައި ސިފައިން އެގައުމަށް ފޮނުވާލަން ވީ ވައުދާ ހިލާފުވެ، އެގައުމުގެ އަސްކަރީ އުޅަނދުތަކެއް ގެންނަން ރައީސް ޑރ.މުހައްމަދު މުއިއްޒު އެއްބަސްވެއްޖެ އެވެ.

އެގޮތައް އެއްބަސްވެފައި ވަނީ ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވާ ރަަސްމީ ދަތުރުގައި އެގައުމުގެ ބޮޑުވަޒީރު ނަރެންދުރާ މޯދީއާ ބައްދަލުކުރައްވައި ދެބޭފުޅުން ކުރެއްވި މަޝްވަރާއަށް ފަހުއެވެ.

ރައީސް އޮފީހުން އިއްޔެ ޝާއިއުކުރި ޖޮއިންޓް ޕްރެސް ރިލީޒްގައި ވާ ގޮތުން އިންޑިއާގެ އަސްކަރީ އުޅަނދުތައް ފޯރުކޮށްދޭނީ ކަނޑުމަގުން ރާއްޖޭގެ ސަލާމަތާއި ރައްކާތެރިކަން ބެލެހެއްޓުމުގައި އެމްއެންޑީއެފްގެ ގާބިލުކަން އިތުރުކުރުމަށެވެ. އެފަދައިން އެ ޕްރެސް ރިލީޒްގައި އޮތުމުން ދޭހަވެގެންދިޔައީ ދިވެހި ސިފައިންގެ ގާބިލުކަން ނެތްކަމަށް ސަރުކާރަށް ގަބޫލުކުރެވޭކަމެވެ.

ފާހަގަކޮށްލެވޭ ގޮތުގައި މިހާރުވެސް އެގައުމުގެ ތިން އުޅަނދެެއް ރާއްޖޭގައި އެބަ އޮތެވެ. އެއީ ޑޯނިއާ މަތިންދާބޯޓާއި ދެ ހެލިކޮޕްޓަރެވެ.

އެހެން ނަމަވެސް ވެރިކަމަށް ވަޑައިގަންނަވަން 2023 ވަނައަހަރުގައި ކުރެއްވި ކެމްޕެއިނުގައި ރައީސް ޑރ. މުހައްމަދު މުއިއްޒު ވައުދުވެވަޑައިގެންނެވީ އިންޑިއާ ސިފައިން ރާއްޖޭން ފޮނުވައިލުމަށެވެ. އަދި އެ ގައުމުން ދީފައިވާ އުޅަނދުތައް އޮޕަރޭޓް ނުކުރާނެކަމަށް ވެސް ވިދާޅުވިއެވެ.

މިފަހަރުގެ އެއްބަސްވުމުގެ ދަށުން އާ އުޅަނދުތަކެއް ފޯރުކޮށްދޭނީ ކަމެއް ނުވަތަ މިހާރު ހުރި އުޅަނދުތައް އޮޕަރޭޓްކުރަން އަލުން ސިފައިން ފޮނުވާނީ ކަމެއް އަދި އެނގިފައި ނެތެވެ..

ޖޮއިންޓް ޕްރެސް ރިލީޒްގައިވާ ގޮތުން ރާއްޖޭގެ ސަރަހައްދު ބެލެހެއްޓުމުގެ ގާބިލުކަން އިތުރުކުރުމުގެ ގޮތުން ރާޑަރު ސިސްޓަމްތަކާއި އެހެނިހެން އިކްއިޕްމެންޓް ފޯރުކޮށްދޭން ވެސް އިންޑިއާއިން ރާއްޖެއާ އެކު އެއްބަސްވުމެއް ވަނީ ހަދާފައެވެ.