ރޭ ބޭއްވި "މޯލްޑިވްސް ސްޕޯޓްސް އެވޯޑް 2024" ގެ މިދިޔަ އަހަރުގެ އެންމެ މޮޅު އަންހެން އަދި ފިރިހެން އެތުލީޓުންގެ މަގާމު ރާއްޖޭގައި މިވަގުތު ތިބި އެންމެ ހުނަރުވެރި ޓީޓީ ދެ ކުޅުންތެރިން ކަމަށްވާ ފާތިމަތު ދީމާ އަލީ އަދި މުހައްމަދު ޝައްފާން އިސްމާއީލް ހޯދައިފިއެވެ.

މިދިޔަ އަހަރުގެ އެންމެ މޮޅު އަންހެން އެތުލީޓް ދީމާ ވަނީ އައިއޯއައިޖީން ރާއްޖެއަށް ރަން ކާމިޔާބީތަކެއް ގެނެސްދިނުމުގެ އިތުރުން ބައިނަލްއަގުވާމީ ގިނަ މުބާރާތްތަކެއްގައި ފަހުރުވެރި ކާމިޔާބީތައް ހޯދައިދީފައެވެ. އޭގެ އިތުރުން ދީމާ މިއަހަރުގެ އޮލިމްޕިކްސްއަށް ކޮލިފައިވެ، އޭނާ ވެފައިވަނީ ރާއްޖޭގެ ތާރީހުގައިވެސް އޮލިމްޕިކްސްއަކަށް ކޮލިފައިވި ފުރަތަމަ އެތުލީޓަށެވެ.

މިއީ މިއެވޯޑް ދީމާ ހޯދި ދެވަނަ ފަހަރެވެ. ދީމާ ވަނީ 2022 ވަނަ އަހަރު ވެސް އެވޯޑް ހާސިލުކޮށްފައެވެ.

ޝައްފާނަކީވެސް ރާއްޖެއަށް އައިއޯއައިޖީން ރަން މެޑަލް ގެނެސްދިން އެތުލީޓެކެވެ. ޓީމް އިވެންޓްގެ އިތުރުން ފިރިހެން ޑަބަލްސްއިންވެސް ޝައްފާން ރަން މެޑަލް ހޯދާފައިވާ އިރު، ގައުމީ ޓީޓީ ޗެމްޕިއަންކަން އެ އަހަރު ހޯދީވެސް ޝައްފާނެވެ.

މިއަހަރުގެ ކުޅިވަރު އެވޯޑްގައި 31 ދާއިރާއަކުން 76 އެވޯޑު ދީފައިވާއިރު، 18 ކުޅިވަރު އެސޯސިއޭޝަނެއްގެ އެންމެ މޮޅު އެތުލީޓުންނަށް ވަނީ އެވޯޑް ހަވާލުކޮށްފައެވެ.

މީގެ އިތުރުން ރާއްޖެއަށް މެޑަލް ގެނެސްދިން އެތުލީޓުންގެ އަގު ވަޒަންކޮށް، ހިދުމަތްތެރިންނަށް ލައިފްޓައިމް އެޗީވްމަންޓް އެވޯޑާއި، ޝަރަފުގެ އެވޯޑު ވެސް ރޭގެ އިވެންޓުގައި ވަނީ އަރުވާފައިވެއެވެ.