މިނިވަން ނޫސްވެރިކަން، ހުރިހާ ނޫސްވެރިންގެ އުންމީދެވެ.

ނޫސްވެރިންނަކީ ގައުމެއްގެ ރައްޔިތުން އެންމެ އިތުބާރު ކުރާ މައުލޫމާތު ހޯދުމާއި ހިއްސާ ކުރާ ފަރާތެވެ. ނޫސްވެރިކަމަކީ ޚަބަރާއި މަޢުލޫމާތު އެއްކުރުމާއި، ވަޒަންކުރުމާއި، އުފެއްދުމާއި، ހުށަހެޅުމުގެ ޙަރަކާތެވެ.

ނޫސްވެރިކަން އެހެން ހަރަކާތްތަކާއި އުފެއްދުންތަކާ ތަފާތުކުރެވޭނީ ވަކި ދެނެގަނެވޭ ސިފަތަކާއި އުސޫލުތަކުންނެވެ. ގިނަ ފަހަރަށް ނޫސް ރިޕޯޓަރުން މަސައްކަތް ކުރަން ޖެހެނީ ހަރުކަށި ސުންގަޑިތަކެއްގެ ދަށުން ކަމަށާއި ފުޅާ ދާއިރާއެއްގައި މައުޟޫއުތަކެއް ރިޕޯޓް ކުރެވޭނެ ގޮތަކަށްކަން ފަހަރުގައި ބަލަން އަދި ކިޔަން ތިބޭ ފަރާތްތަކަށް ވަޒަންކޮށް ފަހުމު ނުވެދާނެއެވެ.

ކަން މިހެން ހުރުމާއެކު ގައުމުގެ ވެރިޔަކަށް ހުންނަ ރައީސް، ނޫސްވެރިންނަށް މިނިވަން ނޫސްވެރިކަމުގެ ހުވަފެން ދައްކައި ވެރިކަމަށް އައުމުން ނޫސްވެރިން ތިބޭނީ އުފަލުންތާއެވެ؟ އެގޮތުން ފެހި ޤާނޫނު އަސާސީ އާއެކު ނޫސްވެރިން ކުރަމުން އައި މަސައްކަތަށާއި، ޚިޔާލު ފާޅުކުރުމުގެ މިނިވަންކަމަށް ލިބުނު އައު އުއްމީދާއެކު ހަގީގީ މާނަައިގައި އެކަންކަން ތަންފީޒުކުރެވި ނޫސްވެރިން ބާރުވެރިކުރުވާނެ ވެރިކަމަށް ރައީސް މުހައްމަދު މުއިއްޒުގެ ވެރިކަން ވާނެ ކަމުގެ ފުރިހަމަ އުއްމީދު ނޫސްވެރިން ކުރީ އެ ނޫސްވެރިންނަށް ދިން ފެހި ސިގްނަލާއެކުއެވެ.

ނަމަވެސް ވެރިކަމުގެ އާރާ ބާރު ހަގީގީ މާނައިގައި ރައީސް މުއިއްޒަށް ލިބިވަޑައިގެންނެވުމުން ނޫސްވެރިންނަށް ދިން މިިނިވަން ނޫސްވެރިކަމުގެ ފެހި ސިގްނަލް ރަތަށް ބަދަލުވެގެން ދިޔައީ، ގައުމުގެ ދަރަނި އަދާކުރަން ފައިސާ ލިބިފައިވާ ކަމަށް ބުނެ ދިން ފެހ ސިގްނަލު ރަތަށް ބަދަލުވީ ފަދައިންނެވެ.

މިހެން މި ދެންނެވީ އަދުގެ ސަރުކާރުގެ އަމަލުތަކާއި، ބަސް މަގު ހުންނަ ގޮތުންނެވެ. ސަރުކާރުގެ އިސްވެރިން ނޫސްވެެރިންނަށް ފުރައްސާރަކޮށް، ދިމާކުރުމާއި، ބައެއް މީޑިއާ ތަކާ މެދު ތަފާތު ކުރުން ސަރުކާރުން ގެންގުޅެމުން އަންނަ ގޮތް އެއީ ސާފުކޮށް ފެންނަން އޮތް ކަމެކެވެ. މައުލޫމާތު ފޯރުކޮށްދިނުމުގައި ވެސް ތަރުޖަމާނު ގޮވައިގެން ކޮފީއަށާ ކެއުންތަކަށް ދާ ނޫސްވެރިންނާ ސަރުކާރު ޒިންމާދާރުކުރުވަން މަސައްކަތްކުރާ ނޫސްވެރިން ތަފާތުކުރުމެވެ.

ތިމަ ތިމާމެން ނުރުހޭ ގޮތަކަށް ނުވަތަ ތިމަ ތިމާމެން ޒިންމާދާރުކުރުވަން ޚަބަރު ފަތުރާ ނޫސްވެރިންނަށާ މީޑިޔާތަކަށް ފިޔަވަޅު ނޭޅިގެން ބޮޑާހާކާ، ރައީސް އޮފީހުގައި އެކި އެކި މޮޅެތި ނަންތައް ކިޔާ އައްޔަންކޮށްފައި ތިބި ކުރީގެ އައުޓު ޑޭޓެޑް ބާސި ކުނޑިތަކެއް ފަދަ ބޭފުޅުން މެދުވެރިކޮށް ތިމަން މަނިކުފާނު އަމިއްލައަށް "ގަނެފައި" ވާ މަޖިލީހަކަށް ހުށަހަޅައިގެން ދައްކަނީ ޚުދުމުހުތާރުކަމުގެ އައްޗި ނަމޫނާއެކެވެ.

ތިމަން މަނިކުފާނަކީ ރައްޔިތުންގެ ފައިސާއިން މުސާރަ ނަންގަވައިގެން ހުންނަވާ ރައްޔިތުންގެ ޚާދިމަކަށްވާއިރު އެ ރައްޔިތުންގެ ތެރޭގައި ނޫސްވެރިންވެސް ހިމެނެއެވެ. އެހެންކަމުން ގާނޫނޫ އަސާސީގެ ތެރެއިން މާއްދާ 27 އާއި 28 އަކީ އަސާސީ ޙައްގަކަށް ވާއިރު އެ ހައްގަށް އަރައިގަތުމަށް ރައީސް މުއިއްޒު މި މަސައްކަތްކުރަނީ ގާނޫނުތަކަށް ގޮން ޖަހަމުންތާއެވެ.

ދުލާ ގަލަމުގެ މިނިވަންކަމަކީ ގާނޫނު އަސާސީއިން ކަށަވަރުކޮށްދީފައިވާ ހައްގަަކަށްވާއިރު ނޫސްވެރިކަމުގެ މިނިވަންކަން އިމެއް ނެތް މިންވަރަށް ދޭނެ ކަމަށް ބުނެ ދެއްކީ ދަޅައެއްކަން މިދަނީ ހާމަވަމުންނެވެ.

ކުރި ސަރުކާރުތަކުގައިވެސް ނޫސްވެރިން އިހުތިޖާޖުތަކުގެ ހައްޔަރުކުރުމާ އަދި ލިޔުނު ޚަބަރުތަކުގެ މަސްދަރާ ގުޅިގެން ފުލުހަށް ހާޒިރުކުރުން ކަހަލަ އައްޗި ކަންކަން ކޮށްފައިވާއިރު މިއަދު އަނެއްކާވެސް އެކަންކަން ރަގަޅު ކުރުމަށް ހަަމަ އެ ނޫސްވެރިންގެ ވެސް ވޯޓާއެކު އައިސް ވެރިކަމުގެ ހުންނަވާ މި ގެންދަނީ ދުލާ ގަލަމުގެ މިނިވަންކަމުގައި ތަޅު އެޅުވުމުގެ ބާބެއް ފަށަން ހެއްޔެވެ.

ރައީސުލްޖުމްހޫރިއްޔާގެ އަގު ވައްޓާލަނީ ކަަމަށް ބުނެ މީޑިއާތަކުގެ މައްސަލަ ޖައްސައިގެން މަޖިލީހަށް އެ މީޑީޔާތަކުގެ ބެލެނިވެރިން ހާޒިރުކުރަން އެދި ނަމަވެސް ތި ކުޅެނީ ބަޑިބޭހާއެވެ. ވެރިކަންތަކުގެ ނިމުން މިހާ ހިސާބަށް އައިސްފައިހުރި ގޮތް ނިކަން ޚަލީލު އާ އިކްރާމުވެސް ރައީސް މުއިއްޒަށް ފިލާވަޅު ނަންގާވާ ދެއްވާށެވެ.

ރައީސުލްޖުމްހޫރިއްޔާ ވެވަޑައިގެންފައިވާ ވައުދުތަކާއި، އެ ވައުދުތައް ފެދެމުން ނުދާތީ ރައްޔިތުންގެ ހުރި ކަންބޮޑުވުންތައް ހާމަ ކުރުމަކީ، މީޑިއާ ތަކުގައި ތަޅު އަޅުވަން ޖެހޭ ސަބަބެއް ނޫނެވެ.

ސަރުކާރުގެ އެކި އެކި ވެރިން ހިންގަމުން ގެންދާ ވައްކަމާއި، ކޮރަޕްޝަންގެ ވާހަކަ ތިލަ ކުރުމަކީ، މީޑިއާ ތަކަށް "އަދަބު" ދޭން ޖެހޭ ސަބަބެއްވެސް ނޫނެވެ. އުޑުގައި ޖެހިފައި ބިމުގައި ޖެހުނަސް ޚިޔާލު ފާޅުކުރުމަށް އޮތް، ދުލާއި ގަލަމުގެ މިނިވަންކަމުގައި އޮބި ނޭޅޭނެއެވެ.

ތިމަންނާއަށް ވާނެ އޭ ކިޔާ ވެރިކަމާ ހަވާލުވެ ހުންނަވަންޏާ ރައީސް މުއިއްޒު ޖަވާބުދާރީ ކުރުވޭނެއެވެ. ނޫނީ ރައީސް ނަޝީދު ވެސް އިސްތިއުފާ ދެއްވި ފަދައިން ތިމަންނާއަށް ދެން ނުވާނެއޭ ވިދާޅުވެ އިސްތިއުފާ ދެއްވާ ގޭގައި މަޑުކުރައްވާށެވެ. އޭރުން ރައްޔިތުންނަށާ ނޫސްވެރިންނަށްވެސް ޖަވާބުދާރީވާން ނުޖެހޭނެއެވެ.

އެތައް ގޮންޖެހުމަކާއެކީ، އެތައް ގުރުބާނީއަކުން މިއަދާއިހަމައަށް ދަތުރު ކޮށްފައިއޮތް ދިވެހި ނޫސްވެރިކަން "މަރުވެގެން ދިޔަނުދީ" އިތުރަށް ހިފެހެއްޓޭނީ ނޫސްވެރިން ވެސް ވަރަށް ބޮޑު ގުރުބާނީއެއް ވެގެން ކަމުގައި ނޫސްވެރިންނާއި މިނިވަން ނޫސްވެރިކަމަށް ލޯބިކުރާ ފަރާތްތަކުން މިއަދު ގަބޫލުކުރަން ޖެހެއެވެ. އެ މިނިވަންކަން ހިމާޔަތް ކުރެވޭނީ ނޫސްވެރިން ދުލުން ބަސްބުނެ އިހުތިޖާޖުކޮށް، ސަރުކާރަށާއި، މަޖިލިހަށާއި، މަޖިލިސް ރިޔާސަތައް އެކަން މަޖުބޫރުވެސް ކޮށްގެންނެވެ.