މި ސަރުކާރު އައި ފަހުން ކެންދޫ ދާއިރާގެ އެއްވެސް ރަށެއްގައި ޕްރޮޖެކްޓެއް ފެށިފައި ނުވާކަމަށް، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒަކީ ވިދާޅުވެއްޖެ އެވެ.

މެމްބަރު މައުރޫފް މިފަދައިން ވިދާޅުވެފައި ވަނީ ބަޖެޓާ ގުޅޭގޮތުން ކުރިޔަށް ދިޔަ ބަހުސްގައި ބަހުސްކުރައްވަމުންނެވެ.

އެގޮތުން މައުރޫފް ވިދާޅުވީ ކެންދޫ އަދި ކަމަދޫގައި ވެސް އެއްވެސް ޕްރޮޖެކްޓެއް ފެށިފައިނުވާކަމަށެވެ. ޕްރޮޖެކްޓުތައް ބަޖެޓުގައި ޖަހާ، އަދަދުތައް ކަނޑައަޅާފައި އެބަހުރިކަމަށް ވެސް އޭނާ ބަހުސްކުރައްވަމުން ވިދާޅުވިއެވެ.

49 ބިލިއަން ރުފިޔާގެ ބަޖެޓުން މިހާ ހިސާބަށް އައިއިރު ހަރަދު ކުރެވިފައިވާ ކަމަށް އޮތީ އެންމެ 18 ބިލިއަން ރުފިޔާކަމަށާ ބާކީވާ 31 ބިލިއަން ރުފިޔާއަށް ވީ ގޮތެއް ނޭނގޭ ކަމަށް އޭނާ ވިދާޅުވި އެވެ.

އެހެން ތިއްބާ އިތުރު ފަސް ބިލިއަންގެ ސަޕްލިމެންޓަރީ ބަޖެޓެއް ހުށަހަޅައިފިކަމަށާ އެ 31 ބިލިއަނަށް ވީ ގޮތެއް ހިސާބުތަކުން ބުނެ ނުދީ, ދައުލަތުގެ މާލީ ރިޕޯޓުތައް ހާމަނުކޮށް އިތުރު ފަސް ބިލިއަން ރުފިޔާ ދޭނީ ކިހިނަކުންތޯ މެމްބަރު މައުރޫފް ވަނީ ވިދާޅުވެފައެވެ.