ކުރީ ސަރުކާރުން ގައުމު ދަރަނިވެރިކޮށްލާފައިވާ ކަމަށާއި ގައުމުގެ ޚަރަދުތައް ކުޑަކޮށް އިގްތިސާދީ  ގޮތުން ގައުމު އާރާސްތުކުރުމުގެ ބޮޑު ޕްލޭން އެއް އޮތް ކަމަށް ބުނި ބުނުންތައް މިއަދުގެ ސަރުކާރުން އެއްވެސް ވަރަކަށް ހަނދާން ނުވަނީބާއޭ ސުވާލު އުފެދެއެވެ.

ރިޔާސީ އިންތިޚާބު ދުވަސްވަރު ކެމްޕެއިންއަށް އެކި ރަށްރަށަށް ވަޑައިގެން މުއިއްޒު ވެވަޑައިގެންނެވިހާ ވައުދުތައް ހަނދާންހުންނާނެ ކަމާއި މެދުވެސް ޝައްކެއްނެތެވެ. ވެރިކަމުގެ ބޭނުމުގައި ދުލަށް އައިހާ ކޮންމެ ކަމެއް ރިޔާސީ ވައުދެއްގެ ގޮތުގައި އޭރު މުއިއްޒު ދިޔައީ ވައުދުވަމުންނެވެ.

ޓެކްސް ރޭޓްތައް އޭރު ހުރި ވަރަށް ވުރެ މައްޗަށް ނުދާނެ ކަމަށާއި ކުދި އަދި މެދު ފަންތީގެ ވިޔަފާރިތަކަށް ހުރި ފުރުސަތުތައް އިތުރުކުރުމަށް ބޮޑު އިސްކަމެއް ދެއްވާނެ ކަމަށް ބުނެ މުއިއްޒު ވަނީ ވަރަށް ބޮޑަށް އޮޅުވާލާފައެވެ. ރައީސް ޔާމީންގެ ނަންފުޅު ބޭނުންކޮށްގެން ރައްޔިތުންނަށް އޮޅުވާލާ ވެރިކަމަށް އައި މީހަކަށް މިފަދައިން ދޮގުހެދުން ވާނީ ވަރަށް ކުޑަ ކަމަކަށް އެހެންނޫންތޯއެވެ.

ނަމަވެސް މިހާރު ފެނިގެންދަނީ ޓެކްސް ރޭޓް ބޮޑުކޮށްގެން ދައުލަތަށް 2.7 ބިލިއަން ރުފިޔާގެ އާމްދަނީއެއް ހޯދުމަށް ރައްޔިތުން ފެލުމަށް ސަރުކާރުން މަސައްކަތް ކުރަމުންގެންދާ ތަނެވެ. މިފަދަ ނިންމުންތައް ސަރުކާރުން ނިންމަމުންދާއިރު، މި ސަރުކާރު ވެރިކަމަށް ގެންނަން މަސައްކަތްކޮށްދެއްވި ކޯލިޝަން މެންބަރުންނާއިވެސް އެއްވެސް މަޝްވަރާ ކުރުމެއްނެތި ވަނީ އެއްކައިރިކޮށްލާފައެވެ.

ސަރުކާރުގެ ހަރަދުތައް ކުޑަނުކޮށް އަދި ބޭކާރު އިސްރާފުތަކުގެ މައްސަލަ ހައްލުނުކޮށް ޓީޖީއެސްޓީ އާއި ގްރީން ޓެކްސް ފަދަ ޓެކްސްތައް ބޮޑު ކުރަން ހުށަހެޅުމުން ގިނަ ބަޔެއްގެ ފާޑުކިޔުންތައް ސަރުކާރަށް ވަނީ ވަރަށް ބޮޑަށް އަމާޒުވެފައެވެ. ޓުއަރިޒަމް ގާނޫނަށް އިސްލާހު ގެންނަން ސަރުކާރުން ހުށަހަޅާފައިވާ ބިލުގައި ކަނޑައަޅާފައި ވަނީ ޖޫން، 2025، އިން ފެށިގެން ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑު ކުރުމަށެވެ. އަދި ޖެނުއަރީ، 2025، އިން ފެށިގެން ގްރީން ޓެކްސް ހަ ޑޮލަރުން 12 ޑޮލަރަށް އިތުރު ކުރަން ވެސް އެ ބިލުގައި ހުށަހަޅާފައިވެ އެވެ.

ޓެކްސް ބޮޑުކުރުމުގެ ބިލު މަޖިލީހުން ފާސްކުރުމުން 68 މެންބަރުން ވަނީ އެއްކޮޅަށް ވޯޓު ދެއްވާފައެވެ. މިއީ ވެރިކަން ކުރާ ޕީއެންސީ މެންބަރުންގެ މެޖޯރިޓީއިން ފާސްކޮށްފައިވާ ބިލެކޭ ބުނުމަކުން މިއަދު ދިވެހި ރައްޔިތުން ހައިރާނެއް ނުވާނެއެވެ. އެއީ އެ މެންބަރުންނަކީ ރައްޔިތުންނަށް ހެޔޮ ނިޔަތެއްގައި މަސައްކަތްތަކެއް ކޮށްދޭން ނިޔަތްގަނެގެން ތިބި ބައެއް ކަމަށް ދިވެހި ރައްޔިތުން މިހާރު ގަބޫލުނުކުރާތީއެވެ.

"ޓެކްސް ނެގުމަކީ ސިސްޓަމެޓިކްކޮށް ފޭރުން. މި ހަގީގަތް ބަދަލެއް ނުކުރެވޭނެ. އެއީ އެއްވެސް ރައްޔިތަކު ބޭނުންވެގެން ކުރި އަދި ކުރާ ކަމެއް ނޫން،" ޖޫން، 2013، ގައި މައްޗަންގޮޅި އުތުރު މެންބަރު އިބްރާހިމް މުހައްމަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ. ޓެކްސް ނެގުމަކީ ފޭރުމެއް ކަމަށް ގަބޫލުކުރި މފަދަ ފަރާތްތަކުން މިއަދު އެއީ "ހުއްދަ" ކަމެއްގެ ގޮތުގައި ސިފަކުރުމަކީ އެމީހުންގެ އިޚްލާސްތެރިކަމާއި މެދު މިއަދު ސުވާލުއުފެދިގެންދާ ކަމެކެވެ.

ދުންފަތުގެ ހުރިހާ ބާވަތްތަކާއި ވޭޕުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރުމުގެ ބިލް، ސަރުކާރުގެ ފަރާތުން މަޖިލީހަށް އިބްރާހީމް ހުށަހެޅުއްވިއިރު،ޓެކްސް ބޮޑު ކުރަނީ ދައުލަތަށް ލިބޭ އާމްދަނީ ބޮޑުކޮށް، ސަރުކާރަށް ނަފާ ހޯދުމުގެ ނަމުގައި ކަމަށް އިބްރާހިމް ވަނީ ބުނެފައެވެ. ނަމަވެސް ޓެކްސް ނެގުން މެންބަރު އިބްރާހިމް ކުރިން ސިފަ ކުރެއްވީ މުދަލުން ހުރުމަތް ކެނޑުމުގެ ގޮތުގައެވެ. މިފަދަ ކަމެއް ކުއްލިއަކަށް ހުރުމަތް އިތުރުވެ ބަރަކާތްލައްވާ ގޮތެއް ނިކަން އިއްޒަތްތެރި މެންބަރުބުނެ ދެއްވާށެވެ.

އިގުތިސޯދީ ހާލަތު މެނާޖުކުރާނެ ގޮތުގެ ޕްލޭނެއް އޮތް ކަމަށް މި ސަރުކާރުން ބުނުމަށް ފަހު، ކުއްލިއަކަށް ޓެކްސްތައް ބޮޑުކުރަން ނިންމެވުމަކީ ސަރުކާރުގެ މާލިއްޔަތު ފެއިލްވުމެވެ.

ޓްރާންސިޝަން މަރުހަލާގެ ތެރޭގައި މިދިޔަ އަހަރުގެ ސަޕްލިމެންޓަރީ ބަޖެޓަށާއި މި އަހަރުގެ ބަޖެޓަށް 600 މިލިއަން ޑޮލަރުގެ ފައިނޭންސް ހަމަޖެހިފައިވާ ކަމަށާއި ފެހި ސިގްނަލްތަކާއި އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ އެހީ ހޯދަން ނުޖެހޭނެ ކަމަށް ބުނެ މުޅި ސަރުކާރު ވަނީ އުނބައްޖެހިފައެވެ.

ފެނިގެން މިދިޔައީ ސަލަމުގެ ނާށިގަނޑު ހިފައިގެން ހިނގައިގެންވެސް ދުނިޔޭގެ އެއްވެސް ގައުމަކުން އެހީނުވި މަންޒަރެވެ. އެންމެ ފަހުން ގޮތް ހުސްވެ ބޯވައެއްހެން ކުލަ ބަދަލުކޮށް އައުޓް އަށް ގޮވި އިންޑިއާގެ އުނގަށްވެއްޓި ގައުމު ވިއްކާލި މަންޒަރެވެ.

މިފަދަ ބަޔަކަށް ގައުމުގެ ވެރިކަން ހެޔޮގޮތުގައި ކުރިއަށް އޮތް 05 އަހަރު ކުރެވިދާނެބާއޭ މިއީ މިއަދު ކޮންމެ ދިވެއްސެއްވެސް ކުރަމުން އަންނަ ސުވާލެކެވެ.