ރައީސް އަބްދުﷲ ޔާމީނަށް އިންސާފު ނުދީ ލާސްކުރަމުން ދާ ދިއުން ކުށްވެރިކުރާ ކަމަށާ އެކަމަކީ މުޅި ދިވެހި އުއްމަތް ކަރުނަ އަޅާ ރޮމުން ގެންދާ މައްސަލައެއްކަމަށް ރައީސް ޔާމީންގެ ގާނޫނީ ޓީމުގައި ހިމެނިވަޑައިގަންނަވާ އަލްއުސްތާޛު އަލީ ޝާހު ވިދާޅުވެއްޖެއެވެ.

ރައީސް ޔާމީން އަލަށް އުފައްދާ ޕާޓީ ޕީއެންއެފްގެ ޓިކެޓުގައި މަޖިލިސް އިންތިހާބުގައި ގއ. ވިލިނގިލީ ދާއިރާއަށް ކުރިމަތިލުމަށް ޝައުގުވެރިކަން ފާޅުކުރައްވާފައިވާ ޝާހު މިފަދައިން ވިދާޅުވީ، ޗެނަލް13 އިން ގެނެސްދޭ ޕީއެންއެފް އަދާހަމަ ޕްރޮގްރާމުގައި ވާހަކަ ދައްކަވަމުންނެވެ.

ޝާހު ވަނީ ރައީސް ޑރ. މުހައްމަދު މުއިއްޒު ވައުދާ ހިލާފުވެފައިވާކަން ފާހަގަކުރައްވާ އެއީ މުނާފިގުންގެ ސިފައެއްކަން ހަނދާން އައުކޮށްދީފައެވެ. މީގެ އިތުރުން ޝާހު ވިދާޅުވީ، ރައީސް ޔާމީންގެ މައްސަލަ މިހާރު ވަރަށް ލަސްކޮށްފި ކަމަށާ އެއީ ސަރުކާރުގެ ތެރެއިން ފޯރުވަމުން ގެންދާ އިންތިހާ ނުފޫޒެއްގެ ސަބަބުން އެނގެން އެބައޮތް ކަމަށް ޝާހު ވިދާޅުވިއެވެ.

ޝާހު އިތުރަށް ވިދާޅުވީ، ޑރ މުއިއްޒުގެ ވެރިކަން މިއަދާ ހަމައަށް އައި އިރުވެސް ސަރުކާރުން އަދި ހުދު ޑރ މުއިއްޒުވެސް ރައީސް ޔާމީން މިނިވަން ކުރުމަށްޓަކައި ކުރެއްވި އެއްވެސް ކަމެއް ނެތް ކަމަށެވެ.