އޯލެވެލް އިން ދަށް ނަތީޖާ ލިބޭ ދަރިވަރުން ފުލުހުންގެ އިދާރާއަށާއި ސިފައިންގެ ޚިދުމަތުގެ ތަމްރީންތައް ހެދުމަށް މަޖުބޫރުވާ ގޮތަށް ގާނޫނެއް އެކުލަވާލުމުގެ މަސައްކަތް ކުރަމުން ގެންދާ ކަމަށް ރައީސް ޑރ މުހައްމަދު މުއިއްޒު ވިދާޅުވުމާއި ގުޅިގެން "ޒުވާނުންނަނށް މަޖުބޫރުކުރުވުން ހުއްޓާލާ" ނަމުގައި ސޯޝަލް މީޑިޔާގައި ޒުވާނުންތަކެއް ނުރުހުން ފާޅުކުރަމުން އަންނަކަން ފާހަގަކުރެވިފައިވެއެވެ.

ގަދަ ބާރުން ފުލުހަށް އަދި ސިފައިންގެއަށް ވައްދައިގެން އިތުރުވާނެ ގައުމީ ލޯތްބެއް ނޯންނާނެ ކަމަށް މި ފަރާތްތަކުގެ ޕޯސްޓްގައި ފާހަގަކޮށްފައިވެއެވެ.

މީގެ އިތުރުން، ސިފައިންނާއި ފުލުހުންގެ އަދަދު އިތުރުކުރާނެ ކަމަށް ރައީސް ވިދާޅުވެފައިވައިރު، މިއީ ޚަރަދުކުޑަކުރުމަށް މަސައްކަތް ކުރަން ޖެހޭ ދަނޑިވަޅެއްގައި އަޅުއްވަން ޖެހޭ ފިޔަވަޅުތަކެއް ނޫން ކަމަށްވެސް ޒުވާނުން އަންނަނީ ބުނަމުންނެވެ.

މަޖުބޫރު ކޮށްގެން ކުދިންގެ ކުރިމަގު ބައްޓަން ނުކުރެވޭނެ ކަމަށާއި އެ ކުއްޖެއް ޝައުގުވެރިކަން ހުރި ދާއިރާތަކުން ފުރުސަތުތައް ފަހިކޮށްދީ ކުރިއެރުމަށް ސަރުކާރުން މަސައްކަތް ކޮށްދިނުމަކީ ޒުވާނުންގެ އެދުމެކެވެ.

ނުކިޔަވާ މީހުން ދިފާއީ ބާރަށް ވެއްދުމަށް ރައީސް މުއިއްޒު ހިތްވަރު ދީ ދެއްކި ވާހަކަތަކަށް އެމަނިކުފާނަށް ވަނީ އާންމުންގެ މަލާމާތާއި ފާޑުކިޔުން އަމާޒުވެފަ އެވެ.

ކޮންމެ ދާއިރާއެއްވެސް ކުރިއަރައިގެން ދާނީ މަސައްކަތް ކުރާ ހިތްވާ އެ ދާއިރާއެއްގެ އިލްމާއި ހިލްމު ލިބިގެންވާ މީހުންގެ މަސައްކަތުން ކަމަށް ވާއިރު މަޖުބޫރުކޮށްގެން މިފަދަ ސިޔާސަތުތައް ނުވަތަ ގާނޫނުތައް ހަދާ ގައުމިއްޔަތު އިތުރެއް ނުކުރެވޭނެ ކަމަށް ޒުވާނުން އަންނަނީ ބުނަމުންނެވެ.