2023 ވަނަ އަހަރުގެ ރިޔާސީ އިިންތިޚާބުގެ ތެރޭގައި އޭރުގެ އިދިކޮޅު ކެންޑިޑޭޓު، މިހާރުގެ ރައީސް މުހައްމަދު މުއިއްޒުއާ ދެކޮޅަށް އޮންލައިން ނޫހަކުން ނެރުނު ރިޕޯޓުގެ ވާހަކަ މި ދުވަސްވަރު ގަދަވެފައިވާއިރު އެ މައްސަލަ އަލުން އޭރު ރިވިއުކޮށް ބަލަން ފެށިކަން ހާމަވެއްޖެއެވެ.

2023 ވަނަ އަހަރުގެ ރިޔާސީ އިންތިހާބުގެ ދުވަސްވަރު، ވެރިކަމުގެ ތިބެގެން އެމްޑީޕީއިން ރައީސް މުއިއްޒާ ދެކޮޅަށް ޖެއްސި އެންމެ ބޮޑު އެންޓި ކެމްޕެއިންގެ ތެރޭގައި ހިމެނެނީ "ދޮންއަމާ" މައްސަލައެވެ.

އެގޮތުން އޮންލައިން ނޫހަކުން އެކަމާ ގުޅިގެން ނެރުނު ރިޕޯޓާއެކު ފުލުހުންގެ ތެރެއިން އަލުން އެ މައްސަލަ ބަލަން ނިންމިކަން "ތޭރަ އޮންލައިން"އަށް ވަރަށް މުއުތުބަރުކޮށް މައުލޫމާތު ލިބިފައިވެއެވެ. ނަން ހާމަނުކުރުމަށް އެދި މައުލޫމާތު ދިން އެ މީހާ ބުނެފައިވާ ގޮތުގައި ރައީސް މުއިއްޒުގެ ދޮން މަންމަ ޖީ ސްކީލާންގެ މައްސަލަ އަލުން ބަލަން ފެށީ އެކަމުގައި ޝައްކު ކުރެވޭ ކަންކަން ހުރުމުންނެވެ. އަދި އެ ގޮތަށް އެ މައްސަލަ ބަލަން ފުލުހުންގެ މައްޗަށް އަމުރު ކުރީ އޭރު ވެރިކަމުގައި ހުރި ރައީސް އިބްރާހިމު މުހައްމަދު ސޯލިހުގެ ޅިޔަނު، އަދި އޭރުގެ ކޮމިޝަނަރ އޮފް ޕޮލިސް މުހައްމަދު ހަމީދު (އެމްޑީއެން ހަމީދު)އެވެ. އަދި އެކަމުގައި ހަމީދުއަށް އެންމެ ވާގިވެރިވީ މިހާރުގެ ކޮމިޝަނަރ އޮފް ޕޮލިސް އަލީ ޝުޖާއު ކަމަށް ވެސް އެމީހާ ކިޔައިދީފައިވެއެވެ.

"ދޮންއަމާ"ގެ މައްސަލައިގެ އިތުރުން ރައީސް މުއިއްޒު ގެކޮޅުގައި ކުރިން މަސައްކަތްކުރަނިކޮށް ދަންޖެހިގެން މަރުވި އެގޭގެ މެއިޑްގެ މަރުގެ މައްސަލަވެސް އަލުން ނަގާ ބަލަން ފެށިއެވެ. އަދި އެ މައްސަލަވެސް އެއީ އޮއްބާލާފައި އޮތް މައްސަލައެއް ކަމަށްވެއެވެ.

އެހެންކަމުން ރައީސް މުއިއްޒު ސަރުކާރުގެ އެންމެ އިސް މަގާމެއްގައި މިހާރު އެ ހުންނެވީ އަލީ ޝުޖާއު ވަނީ އެމަނިކުފާނާ ދެކޮޅަށް އޭރު މަސައްކަތްކޮށްފައި ކަން މިވަނީ ހާމަވެފައެވެ. ކަންކަން މިބީދައިން ހިނގާފައިވާއިރު ރައީސް މުއިއްޒުގެ ސަރުކާރުގައި ތިބި ގިނަ މީހުންނަކީ އެމަނިކުފާނާ ދެކޮޅަށް އޭރު މަސައްކަތްކުރި މީހުންކަމަށްވާތީ ގިނަ ބައެއްގެ ފާޑުކިޔުންވެސް އަމާޒުވެފައިވެއެވެ.