ރައީސް މުހައްމަދު މުއިއްޒު ގެންދަވަނީ މޫނުގެ ކުލަވަރަށް ކުޑަވެސް ބަދަލެއްވެސް ނުގެންނަވާ ހުންނަވާ ހާމަކަން ބޮޑުކޮށް ދޮގުކޮށް ދޮގު ހަދަމުން ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

ބުރާސްފަތި ދުވަހުގެރޭ ޕީއެންއެފް އިން ބޭއްވި ޖަލްސާގައި އިންނަވާ މަލީހު ވަނީ ރައީސް މުއިއްޒު ރައްޔިތުންނަށް ގައުމުގެ ކަންކަން އޮޅުވާލައްވަމުން ގެންދަވާތީ އެކަމާ ކަންބޮޑުވުން ފާޅުކުރައްވާފައެވެ. އެގޮތުން މަލީހު ވިދާޅުވީ ރައީސް މުއިއްޒަކީ އަދި އަނބިކަނބަލުންނަކީވެސް ދީނީ އިލްމުވެރިން ނިސްބަތްވާ އާއިލާތަކަކަށް ނިސްބަތްވާ ދެ ކަނބަނލުންނަށްވުމުން އުއްމީދު ކުރެވުނީ އިންސާފާ ހަމަ ގައުމުގައި އޮންނާނެ ކަމަށް ކަމަށާ އަދި ދޮގު ހެދުމަކީ ކިހާވަރެއްގެކަމެއްކަން ފަހުމުވެފައި އޮންނާނެ ކަމަށް ކަމަށެވެ.

ނަމަވެސް ރައީސް މުއިއްޒުގެ ކިބައިން ފެންނަމުންދަނީ ދީނުގައި އެންމެ ނަފްރަތު އޮންނަ ދޮގު ހެދުމުގެ ނުބައި އާދަ އަށަގެންފައިވާ މަންޒަރު ކަމަށާ އަދި އެމަނިކުފާނު ގެންދަވަނީ މޫނަށް ރުލެއްވެސް އަރުވާ ނުލައްވާ ރައްޔިތުން ކުރިމަތީ ހުންނަވާ އެންމެހާ ބޮޑެތި ދޮގުތައް ހަދާ ދޮގު ވައުދުވަމުން ކަމަށް މަލީހު ވިދާޅުވިއެވެ.

މަލީހު އިތުރަށް ވިދާޅުވީ ސިޔާސީ މަސްރަހުގައި މިހަރު ރައްޔިތުންނަށް ތެދު ހާމަކޮށްދެނީ ހަމައެކަނި ޕީއެންއެފުގެ ޕޯޑިއަމްއިން ކަމަށެވެ.

މަލީހު މިފަދައިން ވިދާޅުވެފައިމިވަނީ، ރިޔާސީ އިންތިޚާބުގައި ރައީސް މުއިއްޒު ވެވަޑައިގެންނެވި ވައުދުތައް، ވެރިކަމަށް ވަޑައިގެން އެމަނިކުފާނުގެ "ދުރު ވިސްނުން"ތަކަށް ބަދަލުކުރަމުންގެންދާ ވެސް ދަނޑިވަޅެއްގައެވެ.