"ބުނި ބަސް" ސެގްމެންޓްގައި މިއަދު މިބަލާލަނީ 13 ޖަނަވަރީ 2019 ވަނަ ދުވަހު އަބްދުއްރަހީމް އަބްދުﷲ (އަދުރޭ) ދެއްކެވި ވާހަކަފުޅަކަށެވެ.

ނޫސްވެރިންނާ ބައްދަލުކުރައްވައި އަދުރޭ ވިދާޅުވީ ތަރައްގީގެ ވާހަކަތައް ދައްކާނަމަ ރައްޔިތުންނަށް އެންމެ ފުރަތަމަ ވެސް ސިފަވާނީ ރައީސް ޔާމީން ކަމަށެވެ. އަދި ތަރައްގީއަށް އެމަނިކުފާނު ކޮށްދެއްވި މަސައްކަތް ރައްޔިތުން ބަލައިގަންނަ ކަމަށް ވިދާޅުވިއެވެ.

މި ސަރުކާރުން ތަރައްގީގެ ނަމުގައި އެއްވެސް ކަމެއް ކުރާތީ ނުފެންނަ ކަމަށާއި ފެންނަނީ ތަންތަނުގެ ނަން ބަދަލުކުރުން ފަދަ "ބޮޑެތި މަޝްރޫއު"ތައް ހިންގާތަން ކަމަށް، ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވިދާޅުވިއެވެ.

އަދުރޭ ވިދާޅުވި ގޮތުގައި، ތަރައްގީ އަކީ ކޮބައިކަން ރައްޔިތުން ތިބީ ރައީސް ޔާމީން ވެރިކަމުގައި ދަސްކޮށްގެންނެވެ. އެއީ ހުޅުމާލެ ތަރައްގީކުރުމާއި ބްރިޖް އެޅުމާއި ނަރުދަމާއާ ބަނދަރު އެޅުން ފަދަ ކަންތައްތައް ކަމަށް ވިދާޅުވިއެވެ.

މި ވެރިކަމުގައި މިހާތަނަށް ރައްޔިތުން އުއްމީދުކުރި ތަރައްގީގެ އެއްވެސް މަޝްރޫއެއް މިހާތަަނަށް ފެށިގެން ނުދާ ކަމަށް ވެސް ވިދާޅުވި އެވެ. އަދި ފާއިތުވި ދުވަސްތަކުން ރައްޔިތުންނަށް ފިލާވަޅެއް ލިބިގެންދާނެ ކަން އޭނާ ފާހަގަކުރެއްވިއެވެ.

މިއީ ރައްޔިތުން ބޭނުންވާ ތަރައްގީ ހޯދައިދޭނެ ސަރުކާރެއް ނޫން ކަމަށް ވެސް އަދުރޭ ވިދާޅުވިއެވެ.