މިއަދު  ރައީސް ޑރ. މުއިއްޒުގެ "ބޮޓުން" ދައްކަމުން އަންނަނީ މާ މޮޅު ވާހަކަ އެކެވެ. މުއިއްޒުގެ ސަރުކާރުން ޑޮލަރަށް ސަލާން ޖެހުން ހުއްޓުވާ ޑޮލަރުގެ ކަޅު ބާޒާރު ސާފުކުރަން އުޅޭ ވާހަކަ އެވެ. މި ކަމަށް މުއިއްޒު ފެށި މަސައްކަތަކީ ޓޫރިޒަމަށް ދިގުމުއްދަތައް އިންވެސްޓް ކޮށްގެން ތިބަ ވިޔަފާރިވެރިނަށް އިންޒާރު ދީ "ފަލީހަތް" ކުރުމެވެ.

ޓެކްސްގެ ބޭރުން ވިޔަފާރިވެރިން ހޯދާ އާމްދަނީ ބޭނުންކުރަންވީ ގޮތް ސަރުކާރުން ކުއްލިއަކަށް ބުނެ ދޭން ފެށި އެވެ. އެއް ވެސް މަޝްވަރާ ނެތި އެވެ. އެތެރެކުރާ ކޮންމެ ގެސްޓަކަށް ސަރުކާރަށް ޑޮލަރު މާރުކުރަން ޖެއްސި އެވެ. އަހާލުމެއް ކަހާލުމެއް ނެތި އެވެ. މުޅި ރާއްޖޭގެ އިގްތިސާދަށް ދެމެހެއްޓެނިވި ގޮތެއްގައި ފައިދާހުރި އަސަރުތަކެއް ކުރާނޭ ގޮތަށް ބޭރު ފައިސާގެ މުއާމަލާތައް ބެލެހެއްޓުމުގެ އުސޫލު ކަނޑައެޅީ އޯވާ ނައިޓަކުން ނެވެ.

މުއިއްޒުގެ އޯޑަރަށް އެމްއެމްއޭއިން ނެރެފައިވާ ގަވާއިދުގައި ބުނަނީ ރިސޯޓުތަކާއި އިންޓަގްރޭޓެޑް ރިސޯޓާއި ފަތުރުވެރިކަމުގެ އުޅަނދުފަހަރާއި ރިސޯޓު ހޮޓަލާއި ސިޓީ ހޮޓާ ފަދަ ތަންތަނުން އެ ތަންތަނަށް އަންނަ ކޮންމެ ފަތުރުވެރިއެއްގެ ބޮލަަކަށް 500 ޑޮލަރު މާރުކުރަންޖެހޭނެ ކަމަށެވެ. އަދި 50 އެނދަށްވުރެ މަދު އެނދު ހުންނަ ގެސްޓުހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަންޖެހޭނެ ކަމަށެވެ.

މިކަމުގެ ހަގީގަތް އިނގިހުރި މީހަކު ބުނީ މުއިއްޒުގެ ރޭވުމަކަށް ވެފައި އޮތީ "ކުއްލި އަކަށް" ދައުލަތަށް ލިބޭ ޑޮލަރު އޭނާގެ ސިޔާސީން ލައްވާ ކަޅު ބާޒާރަށް ނެރެ އަގު ބޮޑުކޮށް ވިއްކުމެވެ. މިއަށް ބާރު ލިބޭ އެއް ހެއްކަކީ ޑޮލަރު މާރު ކުރާ މާލޭގައި ހިންގާހަ އެއްކަ ވިޔަފާރި އަށް ސަރުކާރުން ހުރަސް ނޭޅުމެވެ. ރައްޔިތުން ޑޮލަރު ހޯދަން ދާން މިޖެހޭނީ މަނީ އެކްސްޖޭންޗް ތަކަށެވެ.

އެތަނުން ޑޮލަރު ވިއްކަނީ މިހާރު ވެސް ހިތުހުރި އަގަކަށެވެ. އެމްއެމްއޭގެ ގަވާއިދާ ހިލާފަށެވެ. ނަމަވެސް ވެރިކަމަށް އަހަރެއްވީ އިރު ރޯމާ ދުވާލު އެމްއެމްއޭގެ ގާނޫނާ ހިލާފަށް އެކުރާ ވިޔަފާރި މުއިއްޒުއަށް ނުހުއްޓުވުނެވެ. ބޭނުމަކީ މުއިއްޒުގެ މީހުންލައްވާ އެ ކަޅު ބާޒާރަށް ވެސް ގަދަވެ ގަނެ 15.42 އަކަށް ޓޫރިޒަމުން ލިބޭ ޑޮލަރު މުއިއްޒު ޓީމުން މަގުމަތީ ބާޒާރުގައި 29 ރުފިޔާ އަށް ޑޮލަރެއް ވިއްކުމެވެ.

ބޭންކަށް ޓޫރިޒަމުން ޑޮލަރު މާރުކުރުމުން ދިވެހި ރައްޔިތުމީހާއަށް ވަކި ވަނީ ކޮން މޮޅެއް ހެއްޔެވެ.؟ ބޭންކް ތަކަކީ އާއްމު ރައްޔިތުންނަށް ޑޮލަރު ދޫކުރާ ބައެއް ނޫނެވެ. ހަމައެކަނި ބޭރަށް ފުރާ މީހަކަށް 500 ޑޮލަރު މާރުކުރަން ގައުމީ ބޭންކަށް އަންގަން ކެރިވަޑައިގަތީ ވެސް ރައީސް ޔާމީން އަށެވެ. އެމަނިކުފާނުގެ ވެރިކަން ނިމުނުފަހުން އެތައް އަހަރެއް ވީއިރު ވެސް ފުރާ މީހުނަށް ލިބެމުން އައި 500 ޑޮލަރު ބޮޑުކޮށްލަން ވެސް ނިމުނު ސޯލިހަށް ވެސް އަދި މުއިއްޒު އަކަށް ވެސް ނުކެރުނެވެ.

އެހެން ކަމުން ރާއްޖޭގެ ޓޫރިޒަމް ސިނާއަތުގެ އިންވެސްޓަރުން ފެލައިގެން މުއިއްޒު ޑޮލަރު ހޯއްދަވަން އެ އުޅެނީ ރައްޔިތަކަށް ހެވެއް އެދިގެނެއް ނޫނެވެ.  އެ އުޅޭނީ ކަރަކަރައަށް ދަތުރުކުރައްވާއިރު ބޭނުން ކުރާނެ ޑޮލަރު ހޯދާށެވެ، އެ އުޅެނީ މުއިއްޒުގެ ސިޔާސީން ނަށް މުސާރަ ދޭނެ ފައިސާ ހޯދާ ށެވެ. އަދި ކިއެއްތަ ތި އުޅުއްވަނީ ކަޅު ބާޒާރުގައި ޑޮލަރު ވިއްކުމުގެ ވިޔަފާރި އަށް މުއިއްޒުގެ އަދިރި ދައުލަތުން ވަދެ ހަމަ ޖެހިލާށެވެ.

މަނިކާފު އެވެ. ދިމްޔާތުގައި ދުއިސައްތަ ފަންސާސް ޑޮލަރަށް ވިއްކާ ރޫމެއްގައި ހަތަރު ރޭ ތިބޭ ޓޫރިސްޓުންނަށް ލިބޭ 1،000 ޑޮލަރުގެ އާމްދަނީ އަށް ބަލައި 2،000 ޑޮލަރު މާރުކުރަން ހުދު މަނިކުފާނު އެއް ބަސް ވާނަށް ހެއްޔެވެ.؟

ތެދެކެވެ. މަނިކުފާނުގެ "ޅޮސް" ހިޔާލީ ވިސްނުމުގައި ތި ކުޅުއްވަނީ ބަޑި ބޭހާއެވެ. ތިހެން އުޅުއްވަނިކޮށް ފިހި ދާނެ އެވެ. އޭރަށް މަނިކުފާނުގެ ފަހަތުގައި އަދުރޭ ވެސް ހުރުމަށް ވުރެ، ނުހުރުން ގާތެވެ. ފެތޭ އޮޑިއެއްގެ ރިޔާ ދަށުވާން ބޭނުންވާނީ ކާކު ހެއްޔެވެ.؟

ރައްޔިތުންގެ ފަޅި އޭ ވިދާޅުވެ ރައްޔިތުންގެ ބޮލަށް ކަޑާލާ ޓޫރިޒަމް ދާއިރާގެ ވިޔަފާރިތަކަށް ބޮޑު ބޭއިންސާފެއް ކުރިމަތި ތިކުރުވަނީ އެ ވިޔަފާރި ތަކުގެ ފަހަތުގައި ކިތައް ދިވެހި އާއިލާ ތައް ތިބިކަން އިނގި ހެއްޔެވެ.؟ މަނިކުފާނަށް ދައުލަތެއް ހިންގުމަށް ނުކުޅެދުމަކީ ޓޫރިޒަމް ސިނާއަތް ފުޑާލަން ޖެހޭ ސަބަބެއް ނޫނެވެ.

ރާއްޖޭގައި ގިނަ ރިސޯޓުތަކެއް ހިންގާ ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) ، ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) މެން ފަދަ ކިތަންމެ ވިޔަފާރި ވެރިއަކު މިހާރު ވެސް އެތައް ނަމެއްގައި ދައުލަތަށް އެގެން ދަނީ ޓެކްސް ދައްކަމުން ނެވެ. އަދި އެއީ ވެސް ޑޮލަރުން ނެވެ. ޓެކްސްގެ ނަމުގައި ވިޔަފާރިތަކަށް ބޮޑު ބުރައެއް ޖައްސައް ތައްޔާރުވަމުން އަނެއްކާ ވެސް އެމްއެމްއޭގެ ބަލިކަށި ގަވާއިދަކުން ތިޔަ ޖައްސަވަން އުޅުއްވާ ކުޅިގަނޑަށް މިއަދު ދިވެހިން ވަރަށް ފަރިތަ އެވެ.

ތިޔަ އުޅެނީ މަނިކުފާނަށް ނުވިކި ރިސޯޓްތަކުގައި އުޅޭ ދިވެހި ޒުވާނުންނާއި އެމީހުންގެ އަމާޒަށް މިސްރާބު ހުރި އާއިލާތަކުގެ ވޯޓަށް ނުފޫޒު ފޯރުވާށެވެ. ސަރުކާރުގެ "ސިޔާސީ" އަޅުވެތި ވަޒީފާ ދޫކޮށް ހަލާލު ގޮތުގައި ފައިސާ ހޯދަމުން އަންނަ ރިސޯޓް ބޯއީސްގެ އަގަ ބަންދު ކުރާށެވެ. މަނިކުފާނު އެވެ. ތިހެން އަދި ޖަހާ ލަވައަކަށް މިއަދު ދިވެހިން ނުނަށާނެ އެވެ.

މަނިކުފާނު އެވެ. ތިބާގެ ވެރިކަމަށް އަހަރެއްވަނީ އެވެ. ވީކަމެއް ފުއްދުނު ވައުދެއް އެޅުނު ފްލެޓެއް ހެޔޮ ކުރެވުނު އަސާސީ ބިލެއް ހޯދުނު ކަނޑެއް ނެތެވެ. އިގްތިސޯތުގެ އެއް ލޭ ނާރު ކަމުގައިވާ މަސްވެރިން އެތިބަ ހަނާ ވަނީ އެވެ. ގައުމު އިގްތިސާދު މިއޮތް ހާލަތުގައި މިހާރު ތިޔަ ތަޅާފޮޅަން ފަށަނީ އިގްތިސޯދުގެ މައި އިންޖީނާ އެވެ. ތިޔަ އިންޖީނު ހުއްޓިއްޖެ ނަމަ ގެއްލުންވާނީ ދިވެހި މިނިވަން ވިޔަފާރިތަކަށެވެ.

ހަލާކުވެ ނެތި ދާނީ ދިވެހި އިގްތިސޯދުގެ ރަންބިސް އަޅާ ކުކުޅެވެ. މިގައުމު ކުރިއަށް އޮތް ފަސް އަހަރުތެރޭގައި ބަނގުރޫޓު ވިޔަ ނުދެއްވާ މަނިކުފާނުގެ ސަބަބުން ދިވެހިންނަށް އިތުރަށް ލިބިދާނެ ގެއްލުމަށް ބައްލަވާ އަމިއްލަ ފުޅަށް އިސްތިއުފާ ދެއްވުން ރިސޯޓުތަކަށް ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްކޮށް ހަދާފައިވާ ގަވާއިދަށް ވުރެ މޮޅު އިތުރެވެ.

މިހެން މިދެންނެވީ މި ގަވާއިދަކީ މަނިކުފާނުގެ ނާގާބިލު ކަމުން އުފަންވި ދަރަނީގެ މައްސަލަ ހައްލުކުރުމަށް ވަގުތީ ގޮތުން ހޯދި ހައްލަކަށް ވުމެވެ. މިކަމުގެ ސަބަބުން ދިގު މުއްދަތެއްގައި ރާއްޖޭގެ އިގްތިސާދަށް ވަރަށް ބޮޑެތި ނޭދެވޭ އަސަރުތަކެއް ކުރާނެ އެވެ.

ދިވެއްސަކަށް ހެވެއް އެދެންނާ ވެރިކަން ދޫކޮށްލައްވާ ނުހައްގު މުއްސަދިކަމުން ހޯދި ދިމްޔާތުގައި މަޑުކުރައްވާށެވެ.