މަސްވެރިންނަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުތައް ފުއްދަން ސަރުކާރުން އެއްވެސް މަސައްކަތެއް ކުރަމުން ނުދާ ކަމަށް ބޮޑު ކަންނެލި މަސްވެރިންގެ ޔޫނިއަނުން ހާމަކޮށްފިއެވެ.
ބީކޭއެމްޔޫއިން މިފަދައިން ހާމަކޮށްފައިވަނީ އެކްސްގައި ކުރި ޕޯސްޓެއްގައެވެ.
ސަރުކާރަށް އަހަރު ފުރުން ފާހަގަކުރަން ސޯޝަލް ސެންޓަރުގައި ރޭ ބޭއްވި ޖަލްސާއެއްގައި ރައީސް މުއިއްޒު ވަނީ މަސްވެރިކަމުގެ ދާއިރާއިން ކުރިއެރުންތައް ހޯދާފައިވާ ކަމަށް ވިދާޅުވެފައެވެ. ނަމަވެސް މި ސަރުކާރުން މަސްވެރިންނަށް ގިނަ ވައުދުތަކެއްވި އިރު މިހާތަނަށް އައިއިރު އޭގެ ތެރެއިން ހާސިލު ކުރެވިފައިވަނީ މަދު މިންވަރެއްކަން ގިނަ ބަޔަކު ފާހަގަކުރަމުން ދެއެވެ.
ރައީސް މުއިއްޒުގެ އެ ވާހަކަތަކަށް ރައްދު ދެމުން ބޮޑު ކަންނެލި ޔޫނިއަނުން ބުނީ ސަރުކާރަށް އެއްވެސް ކަމެއް ކޮށްދެވިފައިނުވާ ކަމަށެވެ.
އެގޮތުން މަސްވެރިންނަށްވީ ވައުދެއް ފުއްދުމަށް އެއްވެސް މަސައްކަތެއް ކުރާ ތަނެއް ނުފެންނަ ކަމަށާ މަސްވެރިކަމުގެ ވުޒާރާއިން ފެންނަމުންދަނީ އަވަދިނެތި ސިޔާސީ މަސައްކަތުގައި އުޅޭތަން ކަމަށް ބުނެ ބީކޭއެމްޔޫއިން ނުރުހުން ފާޅުކޮށްފައިވެއެވެ.
މީގެ އިތުރުން މަސްވެރިންނަށް ވީ ވައުދުތަކަކީ ވޯޓް ހޯދުމުގެ ބޭނުމުގައި ވީ ވައުދުތަކެއްކަން ޔަގީންވާކަމަށް ބޮޑު ކަންނެލި މަސްވެރިންގެ ޔޫނިއަންއިން އެކްސްގައި ކޮށްފައިވާ ޕޯސްޓުގައި ލިޔެފައިވެއެވެ.
