މިކަމާ ގުޅިގެން އެމްޑީޕީގެ ރައީސް އަބްދުﷲ ޝާހިދު ވިދާޅުވީ ސޯޝަލް މީޑިޔާގައި ފާޅުކުރި ޝުއޫރަކާއި ގުޅިގެން ފުލުސް އޮފީހަށް ހާޒިރުވާން ޝާފިއު އަށް ޗިޓު ފޮނުވާފައިވާއިރު، ގައްދޫ ކައުންސިލް ރައީސް މުހަންމަދު އަހުމަދު ވަޓްސްއަޕް ގްރޫޕެއްގައި ފާޅުކުރެއްވި ޝުއޫރަކާއި ގުޅިގެން ކައުންސިލުން އޭނާ އަށް ފިޔަވަޅުއަޅަން އެލްޖީއޭ އިން އަންގާފައިވާ ކަމަށެވެ.

އިންސްޕެކްޓަރ އޮފް ޕޮލިސް ބިލާލު އަބްދުލް ހާދީ ސޮއިކޮށްފައިވާ ޗިޓުގައި ބުނެފައިވަނީ "24 ނޮވެމްބަރު ދުވަހުގެ 1:14 ގައި @ޗާލީ_ތުއްތު ހޭންޑްލް އިން ހަޑިހުތުރު ބަސް ބޭނުން ކޮށް ބިރުވެރިކަން އުފެދޭ ގޮތައް އެކްސް ގައ ޕޯސްޓެއްކޮށްފައިވަ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް" ކަމަށެވެ.

ޗިޓުގައި 4 ގަޑިއިރު މިކަމަށް ހޭދަ ވާނެ ކަމަށް ލަފާކުރެވޭ ކަމަށާއި، 1 ޑިސެމްބަރު 2024 ވަނަ ދުވަހުގެ މެންދުރު 1:30ށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ އަށް ހާޒިރުވެ ސާޖެންޓު އަބްދުﷲ ސާޖިދު އާ ބައްދަލު ކުރުމަށް ބުނެފައިވެ އެވެ.

މިކަން ކުށްވެރިކޮށް އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އެކްސްގައި ޕޯސްޓެއް ކުރައްވާފަ އެވެ. އެ ޕޯސްޓުގައި ފައްޔާޒު ލިޔުއްވާފައިވަނީ ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށެވެ.

ޝާފިއު ކުރި ޕޯސްޓުގައި "ކައްޒާބު" އޭ ލިޔެފައިވާއިރު، އެ ނަން ނިސްބަތް ކުރަނީ ސީދާ ކާކަށް ކަން އެނގޭކަށް ނެތެވެ.

ހޯމް މިނިސްޓަރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ ޝާފިއު ކުރި ޕޯސްޓުގައި މީހަކަށް ނިސްބަތްކޮށް އެމީހަކު މަގުމަތިން ފެނުމުން ގެއްލުމެއް ދީފާނެ ކަމަށް ދޭހަވާ ގޮތަށް ލިޔެފައި އޮތުމުން، އެކަމުގެ ތަފްސީލު ހޯދާ ސާފުކުރުމަކީ އިދާރާތަކުން ކުރަން ޖެހޭ ކަމެއް ކަމަށެވެ.