އިސްރާއީލުން ޣައްޒާގައި ކުރަމުންދާ ހަނގުރާމައަށް ހަތަރު މަސްދުވަސް ވާން ކައިރިވެފައިވާއިރު ޣައްޒާގައި 17،000 އަށް ވުރެ ގިނަ ކުޑަކުދިން އެކަނިވެފައި ނުވަތަ އާއިލާތަކާއި ވަކިވެފައި އެބަ ތިބި ކަމަށް އދ.ގެ ކުޑަކުދިންގެ ކަންތައްތަކާ ބެހޭ ޖަމިއްޔާ ޔުނިސެފުން ބުނެފިއެވެ.

އަދި ޣައްޒާގެ ހުރިހާ ކުޑަކުދިންނަށް ކަހަލަ ގޮތަކަށް ނަފްސާނީ އެހީ ބޭނުންވާ ކަމަށްވެސް ޔުނިސެފުން މިއަދު ވަނީ ބުނެފައެވެ.

އޭނާ ބުނެފައިވަނީ އެ 17،000 ކަޑަކުދިންނަކީ ލަފާކުރެވިފައިވާ އަދަދު ކަމަށާއި، ޣައްޒާގެ ހާލަތު އޮތް ގޮތުން އެ އަދަދުތައް ޔަގީން ކުރުމަކީ ވާނެ ކަމެއް ނޫން ކަމަށެވެ.

ކްރިކްސް ވިދާޅުވެފައިވަނީ އެކަނިވެފައިވާ ކުދިން ބައެއް ފަހަރު ޒަހަމްވެގެން ނޫނީ ޝޮކެއް ޖެހިގެން ކޮންމެވެސް ހޮސްޕިޓަލަކަށް ގެންދެވިފައިވާތީ އަދި އެކުދިންނަށް ނަންވެސް ނުބުނެވޭ ކަމަށާއި އެކަމުގެ ސަބަބުން އެކުދިންނަކީ ކޮން ކުދިންނެއްކަން ފާހަގަ ކުރަން ވަރަށް އުނދަގޫ ވެފައިވާ ކަމަށެވެ.

އޭނާ ވިދާޅުވެފައިވަނީ ހަމަނުޖެހުންތަކުގައި މައިންބަފައިން މަރުވާ ކުޑަކުދިންނާއި އެކުދިންގެ އާއިލާތަކުން ހަވާލު ވުމަކީ އާންމު ކަމެއް ކަމަށާއި ނަމަވެސް ޣައްޒާގައި ފެނާއި ކާނާއާއި ހިޔާވަހިކަން ހޯދަންވެސް އިންތިހާއަށް ދަތިވެފައިވާއިރު އާއިލާއަށް އެހެން ކުއްޖެއްގެ ޒިންމާ އުފުލޭ ވަރު ނުވާ ކަމަށެވެ.

ބައެއް ކުދިންގެ މައިންބަފައިން އިސްރާއީލުގެ ހަމަލާތަކުގައި ޝަހީދުވެފައިވާއިރު، އަނެއްބައި ކުދިން އާއިލާގެ އެއްވެސް މީހަކު ނެތި ވަނީ މުޅިން އެކަނި ވެފައެވެ.

ހަނގުރާމައިގެ ކުރިންވެސް ޣައްޒާގެ ފަސް ލައްކައަށް ވުރެ ގިނަ ކުޑަކުދިންނަށް ނަފްސާނީ އެހީތެރިކަން ބޭނުންވާ ކަމަށް ޔުނިސެފުން ބުނެފައިވާއިރު، މިހާރު ޣައްޒާގެ ހުރިހާ ކުޑަކުދިންނަށް ކަހަލަ ގޮތަކަށް ނަފްސާނީ އެހީ ބޭނުންވާ ކަމަށް އެ ޖަމިއްޔާއިން ބުނެއެވެ. އެއީ އެއް މިލިއަނަށްވުރެ ގިނަ ކުޑަކުދިންނެވެ.

އިސްރާއީލުގެ ހަމަލާތަކުގައި ޣައްޒާގެ 27،100 މީހުން ޝަހީދުވެފައިވާ އިރު އޭގެ ތެރޭގައި 11،500 އެއްހާ ކުޑަކުދިން ހިމެނެއެވެ.