އިއްޔެ މާލޭގައި ހިނގި އަލިފާނުގައި ހާދިސާގައި އޮފީސް އިމާރާތްތައް އަނދާ ހުލިވެ ގެއްލުން ލިބުނު ތިން ވުޒާރާގެ މަސައްކަތްތައް ވަގުތީގޮތުން ދަރުބާރުގެއަށް ބަދަލުކުރަން ސަރުކާރުން ނިންމައިފިއެވެ.

މައުލޫމާތު ލިބިފައިވާ ގޮތުގައި ރެއިން ފެށިގެން ދަރުބާރު ގެއަށް މިނިސްޓްރީތަކޔގެ މަސައްކަތް ބަދަލުކުރުމަށް ވަނީ މަސައްކަތް ފަށާފައެވެ.

ހައުސިން އަދި އިންފްރާސްޓްރަކްޗާ މިނިސްޓްރީގެ ހިންގާ ޓިނު އިމާރާތުގައި ރޯވި އެ އަލިފާންގަނޑު ޖެހިގެން ހުރި ގްރީން ބިލްޑިންގުގައި ހިންގާ އެންވަޔަރަމަންޓުގެ އޮފީހަށްވެސް ވަނީ ގެއްލުން ލިބިފަ އެވެ. ޓިނު އިމާރާތް ވަނީ އަނދާ ހުލިވެފަ އެވެ.

މި ހާދިސާއާ ގުޅިގެން، ވުޒާރާތަކުގެ މަސައްކަތް ހުއްޓިފައިވާކަން އިއްޔެ ވަކިވަކީން ނެރުނު ބަޔާންތަކުގައި ބުނެފައިވެ އެވެ.

ސަރުކާރުގެ އިސް އޮފިޝަލަކު މިސް މީޑިޔާގައި ހިއްސާކޮށްފައިވާ މައުލޫމާތުގައިވާ ގޮތުގައި ސަރުކާރުން މިހާރު ވަނީ އެ ތިން ވުޒާރާގެ މަސައްކަތް ދަރުބާރުގެއަށް ބަދަލުކުރަން ނިންމާފައެވެ. އެކަމަށް އެ އިމާރާތުގެ ހޯލުތައް ތައްޔާރުކުރުމުގެ މަސައްކަތް ރޭ ފަށާނެ ކަމަށްވެއެވެ.

ސަރުކާރުން މަަސައްކަތް ކުރަނީ އަންނަ ހަފުތާގެ ރަސްމީ ދުވަސްތައް ފެށެންވާއިރަށް ދަރުބާރުގޭގައި ވަގުތީ އޮފީސް ސެޓަޕްތައް ގާއިމުކޮށް އަލުން މަސައްކަތް ފެށުމައް ކަމަށްވެސް މައުލޫމާތު ލިބިފައިވެއެވެ.

މި ހާދިސާއާ ގުޅިގެން ވުޒާރާގެ މަސައްކަތްތައް ބަދަލުކުރަން ނިންމުމާއެކު މިރޭ ދަރުބާރުގޭގައި ބޭއްވުމަށް ހަމަޖެހިފައި އޮތް މަސްވެރިންގެ ދުވަހުގެ ޖަލްސާވެސް މިހާރު ވަނީ ފަސްކޮށްފައެވެ. އެ ޖަލްސާ ދެން ބާއްވާނެ ތާރީހެއް އަދި ނުނިންމައެވެ.

އިއްޔެ ހެނދުނު ރޯވި އަލިފާންގަނޑުގެ ބޮޑު ބައެއް ނިއްވާލާ ކޮންޓްރޯލްކޮށްފައިވާއިރު، އަދިވެސް އެ ދެ އިމާރާތުގެ އެކި ތަންތަނުގައި ދަނީ ދޭތެރެ ދޭތެރެއިން ރޯވަމުންނެވެ. އެ ސަރަހައްދު ބަންދުކޮށް ފުލުހުންނާއި ސިފައިން އަދިވެސް ދަނީ ހަރަކާތްތެރިވަމުންނެވެ.