މޯލްޑިވްސް އިސްލާމިކް ބޭންކް (އެމްއައިބީ) ގެ ސާވިސް ސެންޓަރެއް ޅ. ނައިފަރުގައި އިއްޔެ ހުޅުވައިފި އެވެ.
އެ ސާވިސް ސެންޓަރު ހުޅުއްވައި ދެއްވީ އެ ރަށު ކައުންސިލްގެ ރައީސް މުހައްމަދު ރަޝީދާއި އެމްއައިބީގެ ސީއީއޯ އަދި މެނޭޖިން ޑިރެކްޓަރު މުފައްދަލް އިދްރީސް ހުމްރީ އެވެ.
އެމްއައިބީން ބުނީ އެ ބޭންކުން ދޭ ހުރިހާ ހިދުމަތްތަކެއް އެ ސެންޓަރުން ލިބޭނެ ކަމަށެވެ. އޭގެ ތެރޭގައި ފައިސާ ޖަމާކުރުމާއި ފައިސާ ނެގުމުގެ ހިދުމަތް އޭޓީއެމް މެދުވެރިކޮށް 24 ގަޑިއިރު ލިބޭނެ ކަމަށް އެމްއައިބީން ބުންޏެވެ.
ނައިފަރުގައި އެމްއައިބީން ހުޅުވި ސާވިސް ސެންޓަރާ އެކު އެ ބޭންކުގެ ހިދުމަތް ޅ. އަތޮޅުގެ އިތުރުން ހއ، ހދ. ބ، ޅ، ކ، ދ، ލ، ގއ، ގދ، ފުވައްމުލައް އަދި އައްޑޫ ސިޓީއަށް ލިބޭނެ އެވެ.
އެމްއައިބީން އަންނަނީ އެ ބޭންކުގެ ހިދުމަތްތައް މުޅި ރާއްޖެއަށް ފުޅާ ކުރުމަށް މަސައްކަތްތަކެއް ކުރަމުންނެވެ. އެގޮތުން އަންނަ އަހަރު ވެސް އެ ބޭންކުގެ އޭޓީއެމްތަކާއި ސާވިސް ސެންޓަރުތައް އެކި ރަށްރަށުގައި ހުޅުވުމަށް ވަނީ ރާވައި އިއުލާން ކޮށްފަ އެވެ.
