ސިނާން / ސަން އޮންލައިން
ހަބަރު
މެމްބަރު ސިނާންގެ ޣައިރު ޒިންމާދާރުކަމުން، ނުކުޅެދޭ ކުއްޖަކާ އެކު އާއިލާއެއް މަގުވެތިވެދާނެކަމުގެ ބިރު!
15 ފެބްރުއަރީ 2025
މާލެ ސިޓީ

ރައްޔިތުންގެ މަޖިލީހުގެ ހުތަދޫ އުތުރު ދާއިރާގެ މެމްބަރު މުޙައްމަދު ސިނާން މޯލްޑިވްސް އިސްލާމިކު ބޭންކަށް ދައްކަން ޖެހޭ ފައިސާ ނުދައްކަވާއިރު އެ ލޯނު ނެގުމަށް މޯގޭޖުކުރި މުދަލާ ގޯތި ވިއްކަން ބޭންކުން ނިންމާފައިވާކަން ހާމަވެއްޖެއެވެ.

މެމްބަރު ސިނާންއާ އޭނާގެ އެންމެ ގާތް އެކުވެރިޔާ މުހައްމަދު ސަލީމު (ރޮބަރ) އާ އަދި މެމްބަރު ސިނާންގެ ބަފައިބެ, އަހުމަދު ވަހީދު (ދޮންބޭގެ އަހުމަދު) އާ ގުޅިގެން ނެގި މި ލޯނަކީ ޖުމްލަ ރުފިޔާގެ ލޯނެކެވެ. ލޯނު ނެގުމަށްޓަކައި ސިނާނުގެ "ރޯދި" ދޯންޏާއި ސަލީމްގެ "ޕްރެޝަސް" ގޯއްޗާއި އެ ގޯތީގައިވާ އިމާރާތްތަކަށް ވަނީ މޯލްޑިވްސް އިސްލާމިކު ބޭންކުގައި ރަހުނުކޮށްފައެވެ.

މިކަމާ ގުޅިގެން "ތޭރަ އޮންލައިން" އަށް މައުލޫމާތު ދިން ފަރާތުން ބުނެފައިވަނީ މެމްބަރު ސިނާންއަށް އެ ލޯނު ނެގުމަށް އޭނާގެ ބެސްޓު ފްރެންޑް ސަލީމު އޭނާގެ ގޯތި ރަހުނުކޮށްދިނީ އެތައް އަދޭހެއް ކޮށް ގަވާއިދުން ލޯނު ދައްކާ އަދި ސަލީމުގެ ނުކުޅެދޭ ކުއްޖާގެ ބޭސްފަރުވާގެ ކަންކަން ވެސް ސިނާންގެ ޚަރަދުގައި ހަމަޖައްސާދޭނެ ކަަމަށް ބުނުމުން ކަމަށެވެ.

ނަމަވެސް ލޯނު ނަގާ އޭގެ ފަހުން ސިނާން އެންމެ ފައިސާ ފޮއްޗެއްވެސް ލޯނަށް ދައްކާފައިނުވާ ކަމަށާ ބޭންކުން ކޯޓަށް ގޮސް މިހާރު ކޯޓުގައި އޮތީ އެންމެ ފަހު މަރުހަލާ ކަމަށެވެ. އެގޮތުން ސިނާން އެ ލޯނަށް ފައިސާ ނުދައްކާތީއާ ކޯޓުން ކުރި ހުކުމާ އެއްގޮތަށްވެސް ފަހުން ފައިސާ ދައްކަމުން ނުދާތީ ބޭންކުން މިހާރު ވަނީ އެ ގޯއްޗާއި ދޯނިވެސް ވިއްކާލަން ނިންމާފައިކަމަށްވެއެވެ. އަދ އެގޮތަށް ކޯޓުން ހުކުމް ކުރުމަށް އަޑު އެހުން ތާވަލްކުރަން ބެލިއިރު ސަލީމު އޭނާގެ ބަލި ދަރިފުޅު ގޮވައިގެން ރާއްޖެއިން ބޭރުގައި އެ ވަގުތު ހުރުމުން އެ ހުކުމް އަދި ވަނީ ނުކޮށެވެ. ނަމަވެސް ހުކުމް ކުރުމުން ބޭންކުން ސަލީމުގެ ވިއްކަން އިއުލާނުކޮށް ގެ ހުސްކުރަން ޖެހޭނެ އިރު ސަލީމުގެ ބަލި ކުއްޖާއާ އަނބިމީހާ ގޮވައިގެން އޭނާ ވަންނާނެ އިތުރު ބޯހިޔަލެއް ނެތް ކަމަށްވެސް މައުލޫމާތު އެނގޭ މީހަކު ވަނީ ކިޔައިދީފައެވެ.

މައުލުމާތު ލިބިފައިވާ ގޮތުގައި ސަލީމު މިހާރު އެނބުރި ރާއްޖެ އައިސް އައްޑޫ ސިޓީގައި ހުރުމާއެކު ކޯޓުން ވަރަށް އަވަހަށް އަޑު އެހުން ތާވަލްވެސް ކުރާނެއެވެ.

މައުލޫމާތު ލިބިފައިވާ ގޮތުގައި މެންބަރު ސިނާން އާއި ސ. ހިތަދޫ، ވާދޫގެ، އަހުމަދު ވަހީދާއި އެ ރަށު، ވިހަލަގޮޑިމާގެ، މުހައްމަދު ސަލީމްގެ މައްޗަށް ސާބިތުވެފައިވަނީ، މޯލްޑިވްސް އިސްލާމިކް ބޭންކަށް ދައްކަން ޖެހޭ 3.8 މިލިއަން ރުފިޔާ ދަރަންޏެކެވެ. އަދި އެ ފައިސާ 2024 ވަނަ އަހަރުގެ އޮކްޓޫބަރު މަހުން ފެށިގެން ހަ މަސް ދުވަހުގެ ތެރޭގައި ދައްކާ ޚަލާސް ކުރުމަށް ކޯޓުން ވަނީ ޙުކުމް ކޮށްފައެވެ.

ނަމަވެސް ޙުކުމާ އެއްގޮތަށް އެފަރާތްތަކުން ފައިސާ ނުދައްކާ ކަމަށްބުނެ މޯލްޑިވްސް އިސްލާމިކް ބޭންކުން އައްޑުއަތޮޅު ހިތަދޫ މެޖިސްޓްރޭޓް ކޯޓަށް 2024 ވަނަ އަހަރުގެ ޖުލައި މަހުގެ 21 ވަނަ ދުވަހު ވަނީ މައްސަލަ ހުށައަޅާފައެވެ.

މި މައްސަލާގައި 14 އޮކްޓޯބަރު 2024 ގައި ހިތަދޫ މެޖިސްޓްރޭޓް ކޯޓުން ޙުކުމް ކޮށްފައިވަނީ އެފަރާތްތަކުގެ މައްޗަށް ސާބިތުވެފައިވާ ދަރަނީގެ ތެރެއިން ނުދައްކާ ބާކީހުރި ދެ މިލިއަން ފަސްލައްކަ ވިހިހާސް ދުއިސައްތަ ބާވީސް ރުފިޔާ ނުވަދިހަ އަށްލާރި ޙުކުމް ކުރި ދުވަހުން ފެށިގެން 6 މަސް ދުވަހުގެ ތެރޭގައި މޯލްޑިވްސް އިސްލާމިކް ބޭންކަށް ދެއްކުމަށެވެ.

އަދި ހުކުމާ އެއްގޮތަށް ފައިސާ ނުދައްކައިފިނަމަ، އެ ފެސިލިޓީއާ ގުޅިގެން ރަހުނުކޮށްފައިވާ ސިނާނުގެ "ރޯދި" ދޯންޏާއި ސަލީމްގެ "ޕްރެޝަސް" ގޯއްޗާއި އެ ގޯތީގައިވާ އިމާރާތްތަކާ ގުޅޭ ރަހުނު އެއްބަސްވުންތަކުގައިވާ ކަންކަން ތަންފީޒުކޮށް އެ ފެސިލިޓީއަށް ދައްކަން ޖެހޭ ހުރިހާ ފައިސާ ހޯދުމުގެ ބާރު އެމްއައިބީއަށް ލިބޭނެ ކަމަށްވެސް ހިތަދޫ ކޯޓުގެ ހުކުމުގައިވެއެވެ.

މި ލޯނަކީ ސިނާން ބުނި ބަހުގެ މައްޗަށް ކުރި އިތުބާރަށް ސަލީމު އޭނާގެ ގޯތި ރަހުނުކޮށްދިން ލޯނެއް ނަމަވެސް ސިނާންގެ ބަހުގެ އިތުބާރު ގެއްލި ލޯނު ނުދައްކާތީ މިހާރު ސަލީމުއާ އޭނާގެ ބަލި ކުއްޖާގެ އިތުރުން އަނބިމީހާވެސް މަގުމަތިވެދާނެކަމުގެ މިވަނީ ހީވެފައެވެ.

މަޖިލިސް މެމްބަރުކަމަށް ހޮވިވަޑައިގެންނެވި ފަހުންވެސް ސިނާން މި ލޯނަށް ފައިސާ ދައްކާފައި ނުވާއިރު މިކަމާ ގުޅިގެން ސިނާންގެ ބަހެއް ވަނީ ލިބޭ ގޮތް އަދި ނުވެފައެވެ. އަދި ސިނާން މިހާރު ލޯނުގެ ފައިސާ ދައްކާ ޚަލާސްކޮށްފިކަމަށް ބުނެ އަޑު ފަތުރަމުންދާއިރު، އެމްއައިބީއަށް އެ ފައިސާ ލިބިފައިނުވާކަން "ތޭރަ އޮންލައިން"އަށް ވަނީ ކަށަވަރުވެފައެވެ.

މައުލޫމާތު އެނގޭ މީހަކު ނަން ހާމަނުކުރުމަށް ޝަރުތުކޮށް ބުނެފައިވަނީ ބޭންކަށް ފައިސާ ދައްކާފައިނުވާ ކަމަށާ ނަމަވެސް ކުރިން އެއްބަސްވުމެއްގައި ސޮއިކޮށްފައިވާ ކަމަށެވެ. އޭގެ ފަހުންވެސް ސިނާން ބޭންކަށް ފައިސާ ދައްކާ ނުވާކަމަށްވެއެވެ.

އެހެންކަމުން ސިނާން ޒިންމާ ނަގާ ގޮތަށް ނެގި އެ ލޯނަށް ފައިސާ ނުދައްކާތީ "ޕްރެޝަސް" ގޯއްޗާ ގޯތިގައި ހުރި އިމާރާތްތައް ވިއްކަން ބޭންކުން އިއުލާންކުރުމުން ސަލީމުއާ އޭނާގެ ބަލި ދަރިފުޅު އަދި އަނބިމީހާވެސް މަގުވެތިވާނެއެވެ.

މިފަދަ ގައިތު ޒިންމާދާރު މީހުން ރައްޔިތުން ތަމްސީލުކުރަން ގޮނޑިތަކުގައި ތިބުމަކީ ލަދު ހުތުރު ކަންކަމުގެ ގޮތުގައި ގިނަ ބަޔަކު ގެންދަނީ މިކަމާ ގުޅިގެން ސިފަކުރަމުންނެވެ.

ކޮމެންޓު
ކޮމެންޓްތައް
Copyright © 2013-2025 Media Ring Pvt Ltd.
All rights reserved