ރާއްޖޭގައި ފުޅާ ދާއިރާއެއްގައި ހަށި ވިއްކި ބިދޭސީންތަކަކާއި އެޖެންޓުންތަކެއް އިމިގްރޭޝަނުން އަތުލައިގެންފި އެވެ.
މޯލްޑިވްސް އިމިގްރޭޝަނުން މިރޭ އެކްސްގައި ކުރި ޕޯސްޓެއްގައި ބުނީ ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރާ ބިދޭސީން ހޯދުމަށް އެ އިދާރާ އާއި ފުލުހުން ގުޅިގެން ހިންގި ހާއްސަ އިންސްޕެކްޝަންތަކެއްގައި ނުވަ ބިދޭސީއަކު ހިފަހައްޓާފައިވާ ކަމަށެވެ.
އެއީ ވިއެޓްނާމުގެ ހަ އަންހެނަކާއި ޔުގަންޑާގެ އަންހެނަކާއި ބަންގުލަދޭޝްގެ ދެ ފިރިހެނެކެވެ. އެ ދެ ފިރިހެނުންނަކީ އޭޖެންޓުންގެ ގޮތުގައި އުޅުނު މީހުން ކަމަށް އިމިގްރޭޝަނުން ބުންޏެވެ.
އިމިގްރޭޝަނުން މިދިޔަ މަހު ވެސް ވަނި ހަށިވިއްކުމުގެ ވިޔަފާރި ކުރި ހަ ބިދޭސީން އަތުލައިގަނެ ޑީޕޯޓު ކޮށްފަ އެވެ.
އިމިގްރޭޝަނުން އަންނަނީ ގަވާއިދާ ހިލާފަށް އުޅޭ ބިދޭސީން އަތުލައިގަތުމަށް ޚާއްސަ އޮޕަރޭޝަންތައް ކުރިއަށް ގެންދަމުންނެވެ. އަދި ހަށި ވިއްކާ ބިދޭސީން އަތުލައިގަތުމަށް ވެސް އޮޕަރޭޝަންތައް ކުރިއަށް ގެންދެ އެވެ.
