ކުރިއަށް އޮތް ދެތިން މަހަކީ ރާއްޖެއަށް އިގްތިސޯދީ ގޮތުން ދަތި ދުވަސްތަކަކަށް ވާނެ ކަމަށް ރައީސް ޑރ. މުހައްމަދު މުއިއްޒު އިއުލާންކުރައްވައިފިއެވެ.

ތ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހެނދުނު އެ އަތޮޅު ގުރައިދޫއަށް ވަޑައިގެން ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް މުއިއްޒު ވަނީ ތަރައްގީގެ މަޝްރޫއުތައް ރާވާލައިގެން ކުރިއަށް ގެންދަން ޖެހިފައިވާ ކަން ފާހަގަކުރައްވާފައެވެ.

އެގޮތުން ނިމި ދިޔަ ސަރުކާރުން ކަންކަން ކުރިއަށް ގެންދިޔަ ބައެއް އުސޫލުތަކުގެ ސަބަބުން އިގްތިސޯދު އޮތީ ދަރަނިވެރިވެފައި ކަަމަށާއި މީގެ ކުރިން ނުވެއްޓޭހާ ދަތި އުނދަގޫ ހާލަތަކަށް ގައުމު ވެއްޓިފައި ކަމަށް ރައީސް މުއިއްޒު ވިދާޅުވިއެވެ.

ރައީސް ވިދާޅުވީ ކުރިއަށް އޮތް ތިން މަސް ވެގެންދާނީ މާލީ ގޮތުން އެންމެ ދަތި އަދި ހައްސާސް ދުވަސްވަރަށް ކަމަށާއި އޭގެ ފަހުން ޖުލައި ހިސާބުގައި އިގްތިސޯދު ރަނގަޅުވާނެ ކަމަށެވެ. އަދި އެކަމަށްޓަކައި ސަރުކާރުން އަޅަން ޖެހޭ ފިޔަވަޅުތައް އަޅަމުން އަންނަ ކަމަށް ވެސް ވިދާޅުވިއެވެ.

ހުރިހާ ކަމެއް ހަމަ މަގަށް އަޅުވައިގެން މެނުވީ ހަގީގީ މާނައެއްގައި ރައްޔިތުންނަށް ތަރައްގީ ނުގެނެސްދެވޭނެ ކަމަށާއި އެ ހަގީގަތް ރައްޔިތުން ވެސް ގަބޫލުކުރަން ޖެހޭ ކަމަށް ރައީސް ވިދާޅުވިއެވެ.

ރައީސް ވިދާޅުވީ ކުންފުނިތަކުގެ ހާލަތު ވެސް ހަމައަކަށް އަޅުވަން ޖެހިފައިވާ ކަމަށެވެ. އެމަނިކުފާނު މަސައްކަތް ކުރައްވަނީ ދެމެހެއްޓެނިވި ތަރައްގީއެއް ގެންނަވަން ކަމަށް ވެސް ވިދާޅުވިއެވެ.

ރައީސް މުއިއްޒު މިފަދައިން ވިދާޅުވެފައިވާއިރު ހޯމަ ދުވަހު އެމަނިކުފާނު އިއްވި ފުރަތަމަ ރިޔާސީ ބަޔާނުގައިވެސް އެފަދަ ވާހަކަތަކެއް ފާހަގަކުރެއްވިއެވެ. އެގޮތުން ރާއްޖޭގެ ތަރައްގީ އާއި ކުރިމަގަށް ސަރުކާރުން ކުރާ ތަސައްވުރާއި އުންމީދު ހަގީގަތަކަށް ހެދޭނީ މާލީ ގޮތުން ގައުމު ވެއްޓިފައި އޮތް އަޑިގަނޑުން ސަލާމަތްވެ، ހިންދެމިލައިގެން ކަމަށް އެމަނިކުފާނު ރިޔާސީ ބަޔާނުގައިވެސް ވިދާޅުވިއެވެ.