މަޖިލީހަކީ މިއަދު ރައްޔިތުންގެ މަޖިލީހެއް ނޫން ކަމަށާއި މަޖިލީހަކީ މިއަދު "ގަރުދިޔަ" ޖަގަހަ ޖަލްސާތައް ނުހިގީމަ ޕީއެންސީގެ ޖަގަހަ ޖަލްސާ ބާއްވާ ތަން ކަމަށް މުހައްމަދު މައިޒަރު އާދަމް ވިދާޅުވެއްޖެ އެވެ.

މައިޒަރު މިފަދައިން ވިދާޅުވީ ބުރާސްފަތި ދުވަހުގެ ރޭ ޕީއެންއެފްގެ ޖަލްސާގައި ވާހަކަދައްކަވަމުންނެވެ.

ޕީއެންއެފްގެ ޖަލްސާތަކުން އިވޭ އެންމެ ޒުވާން އެއް އަޑު ކަމުގައިވާ މައިޒަރު ވިދާޅުވީ ކެބިނެޓް މެންބަރުންނާއި މަޖިލިސް މެންބަރުންނަކީ މިހާރު މިނިވަން ބައެއް ނޫން ކަމަށާއި ކޮންމެ މީހަކު ވެސް މަސައްކަތް ކުރަން ޖެހެނީ "މުއިއްޒު ބުނާ ގޮތަށް ކަމަށެވެ.

މައިޒަރު ވިދާޅުވީ ރައްޔިތުން ތަމްސީލުކުރަން ހޮވާފަ ހުރި މީހުން ޕީއެންސީގެ ތިން މެންބަރުންގެ ކޮމެޓީއަކުން ވަކި ކުރެވޭ ކަމަށާއި މިހެން ކަމުން ރައްޔިތުންގެ ބަސް އިއްވުމުގެ ބަދަލުގައި މަޖިލީހުގައި މިހާރު އިއްވަން ޖެހެނީ "މުއިއްޒުގެ ބަސް" ކަމަށެވެ.

މައިޒަރުގެ މި ވާހަކަތަކަށް ބާރުދީ ޖަލްސާގައި އިންނެވި ރައީސް ޔާމީން ވެސް ވިދާޅުވީ އެއީ ތިން މެންބަރުންގެ ކޮމިޓީއެއް ވެސް ނޫން ކަމަށާއި އެއީ ހަމަ "މުއިއްޒު" ކަމަށާއި މުއިއްޒު ވިދާޅުވާ ގޮތަށް ކަން ކުރަން އެ ތިން މީހުނަށް ވެސް މަޖުބޫރު ވާނެ ކަމަށެވެ.

ޕީއެންއެފް ޖަލްސާގައި ރައްޔިތުންގެ މަޖިލީހުގެ ބާރު ކެނޑިފައިވާ ކަމަށް ޖަލްސާގެ ހާޒިރީން ވިދާޅުވަމުން ގެންދަވާއިރު މި ފަހުން ރައީސް ޑރ. މުއިއްޒުގެ އެދިލެއްވުމަށް ކުއްލި ގޮތަކަށް ގާނޫނު އަސާސީއަށް ގެނެވުނު އިސްލާހުތަކުން މަޖިލީހުގެ މެންބަރުން އެމީހާ ތަމްސީލުކުރާ ޕާޓީއާއި ދެކޮޅަށް ބަހެއް، އިޝާރާތެއް ނުވަތަ ވޯޓެއް ދެއްވިޔަސް އަދި އޭނާގެ ޕާޓީގެ ލީޑަރަށް ފެނިގެން އޭނާ ޕާޓީން ކަނޑައިލިޔަސް ވަގުތުން ރައްޔިތުންގެ މަޖިލީހުގެ އޭނާ ތަމްސީލުކުރާ ދާއިރާގެ ގޮނޑި ގެއްލޭ ނެ އެވެ.

ނަތީޖާ އަކީ ރައްޔިތުންގެ މަޖިލީހުގެ މެންބަރުންގެ ބަހުސްތަކުގައި ދެން އިސްކަން ދޭން ޖެހޭނީ ޕާޓީގެ ރައީސް ނުވަތަ ލީޑަރުގެ އަމުރު މައުރޫފަށެވެ. ރައްޔިތުންގެ މަޖިލީހުގައި "ރައްޔިތުންގެ އަޑު" ކެނޑި ގާނޫނު އަސާސީގެ 4 ވަނަ މާއްދާގައި ބުނާ ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމި އޮންނަނީ ރައްޔިތުންގެ ކިބައިގައެވެ.

މި ގާނޫނީ ތަސައްވަރު "ހަތަމް" ވީ އެވެ.