ސަރުކާރު ތެރެއިން ގިނަ ވައްކަންތަކެއް ފެންމަތިވެފައިވާއިރު އެކަންކަމުގެ މުގުލުގައި ހުރީ ސިދާ ރައީސް މުހައްމަދު މުއިއްޒު ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުތެރޭ ފެންމަތިވެގެން އުޅޭ ހުރިހާ ވައްކަމެއް ގުޅެނީ ޕީއެންސީގެ ބޮޑުންނާ އަދި ސީދާ ރައީސް މުއިއްޒާ ކަމަށް ރައްޔިތުން ތުހުމަތުކުރާ ކަމަށެވެ. އަދި ރައީސް މުއިއްޒުގެ ސަރުކާރުން ހިންގަމުންދާ ވައްކަންތަކާއި ކޮރަޕްޝަންތަކުގެ މިނިވަން ތަޙްގީގަކަށް އޮތް އެންމެ ބޮޑު ހުރަހަކީ ދާޚިލީ ވަޒީރު އަލީ އިޙްސާނުކަމަށް ވިދާޅުވެ ޑރ ޖަމީލު ވަނީ ވަޒީރު އިހުސާނުގެ އަމާޒުހުރީ މިޖަރީމާތަކަށް ފަސްއަޅާ ފޮރުވަންކަމަށް ތުހުމަތު ކުރައްވާފައެވެ.
ޑރ ޖަމީލު މިފަދައިން ވިދާޅުވެފައި މިވަނީ ހޯމް މިނިސްޓްރީ ދަށޫން ޑީއެންއާރު ހިނގާއިރު ޑީއެންއާރުގައި ހުރންނަ ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީއަށް "ވަގަށް" މެމްބަރުން ވައްދަމުންދާތީ އެކަމާ ކަންބޮޑުވުން ފާޅުކޮށް އެ މައްސަލަ ބަލަން އެމްޑީޕީއިން ގޮވާލާފައިވާ ދަނޑިވަޅެއްގައެވެ.
