އަޟްހާ އީދު އައިސް ބައްދަލުކޮށްފައިވަނިކޮށް، ގައުމުގެ ރައްޔިތުންނަށް މުނާސަބަތާ ގުޅުވާ ކުރާ އީދު ސަލާން ނުކުރައްވާ ރައީސް ޑރ މުހައްމަދު މުއިއްޒު ކުއްލި ގޮތަކަށް ސިންގަޕޫރަށް ވަޑައިގެންނެވުމުން، ކުރީގެ ނައިބު ރައީސް އަދި ޕީއެންއެފްގެ ވެސް ނައިބު ރައީސް ޑރ. މުހައްމަދު ޖަމީލު އަހުމަދުގެ ފާޑުކިޔުން އަމާޒުކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ޑރ ޖަމީލު ވަނީ، ބޮޑު ޢީދު މިއައީ ދިވެހިން މިފަހަކުން ނުދެކޭފަދަ ތަދުމަޑުކަމަކާއި އެކު ނަމަވެސް، ގައުމުގެ ރައީސް އިސްކުރެއްވީ، އަމިއްލަ އަރާމަށާ ޗުއްޓީއަށް ކަމަށާ ގައުމުގެ ރައީސަށް ރައްޔިތުން ކައިރީ އީދު ސަލާމަށްވެސް މަޑުކޮށް ނުލެވުނު ކަމަށެވެ.
ބޮޑު އީދު ބަންދެއް ދިމާވެ އާއިލާތައް ކައިރިއަށް އާންމު މުވައްޒަފުން ޗުއްޓީއަށް ދިޔައީ މުސާރައާ ނުލައި ކަން ފާހަގަކުރައްވާ ޑރ. ޖަމީލު ވަނީ، ރައީސް މުއިއްޒުގެ ވެރިކަން ފެށުމާއިއެކު ރައްޔިތުން ކުރިމަތިލާން ޖެހިފައިވަނީ ފަގީރުކަމާ ކަމަށްވެސް ވިދާޅުވެފައެވެ.
މީގެ އިތުރުން މުއްސަނދިވީ ރައީސް މުއިއްޒާ އެބޭފުޅާގެ އާއިލާއެކަނި ކަމަށް ވިދާޅުވެ ޑރ ޖަމީލު ވަނީ ވެރިކަމެއް ގޯސްވާނީ މިހާކަންހާ ވަރަށް ކަމަށް ވިދާޅުވެ ވަރަށް ބޮޑަށް ސަރުކާރަށް ފާޑުވިދާޅުވެ ނުރުހުން އަމާޒުކުރައްވާފައެވެ.
