ދިވެހިރާއްޖެއާ އިންޑިއާގެ ސަފީރުވެސް ދެ ގައުމުގެ ފޮރިން މިނިސްޓްރީއަށް ހާޒިރުކޮށްފިއެވެ.

ރާއްޖޭގެ ޓުއަރިޒަމް ބޮއިކޮޓުކުރުމަށް ގޮވާލާ އިންޑިއާގެ ބޮޑު ވަޒީރު ނަރެންދްރަ މޯދީ އެ ގައުމުގެ ޓުއަރިޒަމް ޕްރޮމޯޓުކުރުމަށް ވައިރަލްކުރި ވީޑިއޯ އާ ގުޅިގެން ދެ ގައުމުގެ އާންމުންގެ މެދުގައިވަނީ ބަހުގެ ހަމަލާތައް އެކސްގައި ބަދަލުކުރަން ފަށަފައެވެ. އެ ބަހުގެ ހަމަލާތަކުގެ ތެރޭގައި ދިވެހި ސަރުކާރު ހަ މަސް ދުވަހުގެ ތެރޭގައި ވައްޓާލާނެ ކަމުގެ އިންޒާރުވެސް ވަނީ ދީފައެވެ.

މިކަމާ ގުޅިގެން ދެ ގައުމުގައި ތިއްބަވާ ދެ ސަފީރުންވެސް ވަނި ދެ ގައުމުގެ ފޮރިން މިނިސްޓްރީއަށް ހޯމަ ދުވަހު ހާޒިރުކޮށްފައެވެ.

އެގޮތުން ރާއްޖޭގެ ފޮރިން މިނިސްޓްރީއަށް އިންޑިއާ ސަފީރު ހާޒިރުކޮށްފައި ވާއިރު، އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބު ވަނީ އިންޑިއާގެ އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފައިވެއެވެ.

ފޮރިން މިނިސްޓްރީގެ ސީނިއަރ ޕޮލިޓިކަލް ޑިރެކްޓަރ މުހައްމަދު ވިޝާމް ޗެނަލް13އަށް މައުލޫމާތު ދެއްވި ގޮތުގައި ހޯމަ ދުވަހުގެ 12 ޖެހިއިރު އިންޑިއާ ސަފީރު ވަނީ ރާއްޖޭގެ ފޮރިން މިނިސްޓްރީއަށް ހާޒިރުވެފައެވެ. ހާޒިރުކުރި ކޮން ކަމަކާ ގުޅިގެން ތޯ ކުރި ސުވާލަށް ޖަވާބަށް ދެއްވަމުން ވިޝާމް ވިދާޅުވީ ހިނގަމުން ދާ ކަންކަމުގައި ސަރުކާރުގެ ސްޓޭންޑް އިތުރަށް ސާފުކޮށްދިނުމަށް ކަމަށެވެ.

މިކަމާ ގުޅިގެން ނަން ހާމަނުކުރުމަށް އެދި ފޮރިން މިނިސްޓްރީގެ އޮފިޝަލަކު ވިދާޅުވީ މޯދީގެ ދަށު ދަރަޖައިގެ އަމަލާއެކު ދެ ގައުމުގެ ދެމެދުގައި ހިތްހަމަ ނުޖެހުން އުފެދިފައިވާ ކަމަށަ އެގޮތުން ރާއްޖޭގެ ސަފީރު ހާޒިރުކޮށް އިންޑިއާ އިން މައްސަލަ ބޮޑުކޮށްލަން މަސައްކަތް ކުރީ ކަމަށެވެ. އެހެންކަމުން ދިވެހި ސަރުކާރުން އެކަމާ މެދު ހިތް ހަމަ ނުޖެހި އިންޑިއާ ސަފީރު ހާޒިރުކޮށް ސުވާލުކުރަން ނިންމީ ކަމަށަ މިއި އިންޑިއާއާ ބައިވެގެން އެމްޑީޕީއިން ގަސްތުގައި ހިންގަމުން ގެންދާ ޖަރީމާއެއް ކަމަށްވެސް އޮފިޝަލް ވަނީ ވިދާޅުވެފައެވެ.

އިންޑިއާ ސިފައިން މި ގައުމުން ބާލަން އުޅޭތީއާ އަނބުރާ ގައުމަށް އެމީހުން ގެންދިއުމަށް ސަރުކާރުން އިންޑިއާއަށް އެންގުމުން މަތި އޮމާންކޮށްލުމުގެ ގޮތުން އޭރު އެކަމާ އެއްބަސްވުމަށްފަހު ރާއްޖެއާ ދެކޮޅަށް އިންޑިއާ އިން ނުކުތީ ގަސްތުގައި ކަމަށްވެސް އޮފިޝަލް ވަނީ ވިދާޅުވެފައެވެ. އެހެންކަމުން އިންޑިއާއިން ބޭނުންވާ ނުފޫޒު ރާއްޖޭގެ މައްޗަށް ހިންގަން އުނދަގޫވުމުން ރާއްޖޭގެ އަގު ވައްޓާލަން އިންޑިއާ އާ އެމްޑީޕީއިން ރާވފާއިވާ ބޮޑު ރޭވުމެއްގެ ގޮތުގައި އެ އޮފިޝަލް ވަނީ މިކަން ސިފަކޮށްފައެވެ.

ސަރުކާރުގެ އޮފިޝަލް މިހެން ވިދާޅުވި ނަމަވެސް ސަރުކާރުން ވަނީ ރާއްޖޭގެ ދިފާއުގައި ތެދުވި ތިން ނައިބު ވަޒީރަކާ މެދު ފިޔަވަޅު އަޅަފައެވެ. އެކަމާ ގުޅިގެން ގިނަ ބައެއްގެ ފާޑުކިޔުން އަމާޒުވެފައިވާއިރު އެ މީހުން ބުނަމުން ގެންދަނީ އިންޑިއާގެ ނުފޫޒު ރައީސް މުހައްމަދު މުއިއްޒުގެ މައްޗަށް އޮތް މިންވަރު ހާމަވެގެން ދާ ކަމަށާ ރައީސް އަބްދުﷲ ޔާމީން ހުންނެވި ނަމަ އެންމެ ފިޔަވަޅެއްވެސް ގައުމުގެ ހައްގުގައި ފަހަތަށް ޖެހިވަޑައި ނުގަންނަވާނެ ކަމަށެވެ. ބެލެވޭ ގޮތުގައި ރައްޔިތުން އެ އިޝާރާތްކުރަނީ އިންޑިއާގެ ދިފާއުގައި ފޮރިން މިނިސްޓްރީއިން ނެރުނު ބަޔާނަށެވެ.

އިންޑިއާއިން ރާއްޖޭގެ އޭރެއްގައި އޮންނަ ވެރިކަމަކަށް ނުފޫޒު ފޯރުވާ އެމީހުން ބޭނުންވާ ޓާރމްސް ނުވަތަ ކަންކަމަށް ޑިމާންކުރެއެވެ. އެގޮތުން އިންޑިއާއަށް އެކަމުގައި ކާމިޔާބު ނުލިބުނީ ރައީސް ޔާމީންގެ ޒައާމަތުގައެވެ. އެހެންކަމުން އިންޑިއާއިން ރައީސް ޔާމީންއާ މެދު ނުހަނު ޖެހިލުންވެއެވެ. ރައީސް ޔާމީން ވަނީ އިންޑިއަން މިލިޓަރީ މިގައުމުގައި ތިބި ތިބުމާ ދެކޮޅަށް ގައުމި ބޮޑު ކެމްޕޭން އިންޑިއާ އައުޓުވެސް ފައްޓަވާފައެވެ.