ޓިނުގަނޑު ތަކަށްދާންދެން ވަގަށް ނަގަން ފޯރިނަގާ ބަޔަކު ކޮންމެ ފަދަ ދޮގެއްވެސް ހަދައިފާނެކަމަށް ބުނެ ރައީސް އަބްދުﷲ ޔާމީންގެ އިސް ޤާނޫނީ ވަކީލް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ.ޖަމީލް މިފަދައިން ވިދާޅުވީ، ދިވެހިން ގިނައިން އުޅޭ ސްރީލަންކާ، އިންޑިއާ އަދި މެލޭޝިއާގައި ދިވެހި ދަރިވަރުންނާއި ދިވެއްސާއި އިސްލާމް ކިޔަވައިދިނުމަށް ހިންގަމުން އައި ޕްރޮގްރާމް، މިދިޔަ ސަރުކާރުގައި އޮތީ ހުއްޓިފައި ކަމަށް ވިދާޅުވެ އިތުރުފުޅު ހެއްދެވުމާއި ގުޅިގެންނެވެ.

އެގޮތުން ޑރ.ޖަމީލް އެކްސްގައި ކުރެއްވި ޕޯސްޓެއްގައި ވިދާޅުވީ، ޓިނުގަނޑު ތަކަށްދާންދެން ވަގަށް ނަގަން ފޯރިނަގާ ބަޔަކު ކޮންމެ ފަދަ ދޮގެއްވެސް ހަދައިފާނެކަމަށެވެ.

އިތުރަށް އެޓްވީޓުގައި ވަނީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒާއި ސަރުކާރުގެ އިސްބޭފުޅުން މޫނުގައި ފަރުމާކޮށްފައިވާ އިސްތަށިކޮޅުން ގޮތް ނުނިންމޭނެ ކަމަށާއި ގޮތް ނިންމާނީ، ރައީސް އޮފީހުގެ ހާލަތައް ބަލައިފައި ކަމަށެވެ. އަދި ރައީސް އޮފީހުގެ ހާލަތައް ބަލާއިރު، އިސްފަޑިތަކުގައި ތައުލީމެއް ނެތް އެތައް ބަޔަކު ތިބި ކަމަށްވެސް އެމަނިކުފާނު ވަނީ ފާހަގަކުރައްވާފައެވެ.

ޑރ.ޖަމީލް މިފަދައިން ވިދާޅުވެފައިވާއިރު، އާންމުންގެ ތެރެއިންވެސް ގިނަ ބަޔަކު އަންނަނީ ސަރުކާރަށް ފާޑު ކިޔުން އަމާޒުކުރަމުންނެވެ.