ވަޒީރު މުއްތަލިބު ކެމްޕެއިނަށް މަކުނޫދުއަށް ދިއުމުން ރައްޔިތުން ނުކުމެ އިހުތިޖާޖުކުރަމުންދާ ކަން ހާމަވެއްޖެއެވެ.

އެގޮތުން މީސް މީޑިޔާގައި އާންމުކޮށްފައިވާ ވީޑިއޯތަކުން ފެންނަ ގޮތުގައި ވަޒީރު މުއްތަލިބު މަކުނޫދޫއަށް ވަޑައިގަތުމުން ރައްޔިތުން ވަނީ ރިޔާސީ ވައުދުތައް ލިޔެ ގަޑުތައް ހިފައިގެން ވަޒީރުގެ ފަހަތުން ޖަލްސާ ބޭއްވި ހިސާބާ ހަމައަށް ވެސް ގޮއްސައެވެ.

މީގެ އިތުރުން ވައުދުތައް ނުފުއްދާތީ ޖަލްސާގައި ބައިވެރިވެ ވެސް ރައްޔިތުން ވަނީ ހިމޭން އިހުތިޖާޖުކޮށްފައެވެ.

ބުރާސްފަތި ދުވަހު ރައީސުލް ޖުމްހޫރިއްޔާ އިއްވެވި ރިޔާސީ ބަޔާނުގައި މަކުނުދޫ އެއަރޕޯޓުގެ ވާހަކަ ނެތުމުންނާއި، ރަށުގެ ކަރަންޓު ހާލަތުު ދަށްވެ، އިރުއިރުކޮޅުން ކަރަންޓު ކެނޑޭ މައްސަލަ ހައްލު ނުވެ ދިގުލައިގެން ދިއުމަކީ ވެސް ރައްޔިތުން މިއަދު އިިހުތިޖާޖުކުރި މައްސަލަތަކެވެ.

މަކުނޫދޫގައި އެއާޕޯޓެއް ގާއިމުކޮށްދިނުމަކީ ރައީސް މުހައްމަދު މުއިއްޒުގެ ވައުދެއް ނަމަވެސް އަދިވެސް އެކަމަށް އެއްވެސް އަމަލީ މަސައްކަތެއް ފަށަފައިނުވާތީ ރައްޔިތުން ވަނީ ކަންބޮޑުވުން ފާޅުކޮށް ނުރުހުން ސަރުކާރަށް އަމާޒުކޮށްފައެވެ.

ކޮންސްޓްރަކްޝަން ހައުސިންގ އެންޑް އިންފްރާސްޓްރަކަޗަރ މިނިސްޓަރު މަކުނުދޫ އަށް ވަޑައިގަތީ ހޮނިހިރު ދުވަހު އޮންނަ ލޯކަލް ކައުންސިލު ބައި-އިލެކްޝަން ގައި ވާދަ ކުރާ ޕީއެންސީ ގެ ކެންޑިޑޭޓަށް ކެމްޕެއިން ކޮށްދެއްވުމަށެވެ.

މަކުނުދޫ ދާއިރާ ތަމްސީލު ކުރައްވަނީ ސަރުކާރު ނިސްބަތްވާ ޕާޓީގެ މެމްބަރެކެވެ.