ގާޒާގެ ފަލަސްތީނުން މިސްރާއި ޖޯޑަނަށް ބަދަލުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅި ހުށަހެޅުމާ ދެކޮޅަށް އަރަބި ގައުމުތަކުން ދެއްމުންދާ ރައްދުގައި ބައިވެރިވެ ޗައިނާއިން ވެސް އެމެރިކާއަށް ރައްދުދީ ވާހަކަ ދައްކައިފި އެވެ.

ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫއާ އެކު ވައިޓްހައުސްގައި ބޭއްވި ބައްދަލުވުމަށް ފަހު ޓްރަމްޕް ވިދާޅުވީ ގާޒާ ހިފުމަށްފަހު އެމެރިކާއިން އެތަން އަލުން އާބާދުކޮށް، އެތައް ހާސް ވަޒީފާ އުފައްދާނެ ކަމަށެވެ.

ހާލުގައި ޖެހިފައި ތިބި ފަލަސްތީނު މީހުންނަށް އެހެން ގައުމުތަކަށް ދިޔުމަށް ފުރުސަތު ދޭނެކަން ފާހަގަކުރައްވާ ޓްރަމްޕް ވިދާޅުވީ ފަލަސްތީނުގެ މީހުންނަށް އެ ގައުމުގައި ފުރިހަމަ މިނިވަންކަމާ އެކު ދިރިއުޅެވޭނެ ކަމަށެވެ.

ޓްރަމްޕްގެ ވާހަކަތަކާ ގުޅިގެން ގައުމުތަކުގެ އިތުރުން ބައިނަލްއަގުވާމީ ޖަމިއްޔާތަކުނ އަންނަނީ ކަންބޮޑުވުން ފާޅު ކުރަމުންނެވެ.

ޗައިނާ ޚާރިޖީ ވުޒާރާގެ ތަރުޖަމާން ގުއޯ ޖިއާކުން ވިދާޅުވި ގޮތުން ޣައްޒާގައި ފަލަސްތީން މީހުން ނޫން ބައެއްގެ ހައްގު އޮތް ކަމަށް ޗައިނާ ދުވަހަކުވެސް ގަބޫލުނުކުރާނެ އެވެ.

ޣައްޒާ ރައްޔިތުން އަމިއްލަ ބިމުން ބޭލުމަށް އެމެރިކާގެ ރައީސް ގެންގުޅުއްވާ އަޑި ނޭގޭ ރޭވުމަކީ އަދަކު އަދި އިއްޔެއަކު ބަޔަކު ލައިދީގެން އުޅޭ ބުއްދިއެއް ނޫން ކަމަށްވެސް ތަރުޖަމާން ވިދާލުވި އެވެ.

އެ ސަރަހައްދުގައި ޔަހޫދީންނަށް ލަގްޒަރީ މާރުކޭޓުތައް ހަދައިދިނުމަކީ އެމެރިކާއިން މާކުރިން ވެސް ވިސްނާފައި އޮތް ކަމެއް ކަމަށް ތަރުޖަމާން ވިދާޅުވި އެވެ.

ފަލަސްތީނު އޮތޯރިޓީ އާއި ހަމާސް އަދި އަރަބި ގައުމުތަކުން ވެސް ވަނީ ޓްރަމްޕްގެ ހުށަހެޅުއްވުމާ ދެކޮޅު ހަދާފަ އެވެ. ޗައިނާއިން ވެސް ވަނީ ޣައްޒާ ނިސްބަތްވަނީ ފަލަސްތީނުގެ ރައްޔިތުންނަށް ކަމަށް ބުނެފަ އެވެ.

ގާޒާގެ ރައްޔިތުން އަމިއްލަ ވަޒަނުން ފައްސާލުމަށް އެމެރިކާއިން މަސައްކަތްކުރަމުންދާ މި ދުވަސްވަރު 16 މަސް ދުވަހުގެ ދިގު ހަނގުރާމައަކަށް ފަހު މިދިޔަ ޖަނަވަރީ މަހުގެ 19ވަނަ ދުވަހު ގާޒާގައި ވެރިކަންކުރާ ހަމާސާއި ޔަހޫދީންނާ ދެމެދު ވެފައިވާ ޙަމަލާ ބަދަލުކުރުން ހުއްޓައިލުމުގެ އެއްބަސްވުން އޮތީ ނާޒުކު ހާލަތެއްގަ އެވެ.

ހަމާސްގެ ތަރުޖަމާން އަބޫ އުބައިދާ ބުނި ގޮތުން ސަހްޔޫނީން ދަނީ ސުލްހައިގެ އެއްބަސްވުންތަކާ ޚިލާފުވަމުންނެވެ. މޭޒު ދޮށުން އެއްބަސްވި ގޮތަށް، އިޒުރޭލުގެ ޖަލުތަކުގައި ތިބި ފަލަސްތީންގެ ހަނގުރާމަވެރިން ދޫނުކުރާ ކަމަށްވެސް ތަރުޖަމާން ބުންޏެވެ.

ގާޒާއިން ފައިބައިގެން ދިޔަ މީހުން އެނބުރި އަންނައިރު ސަހްޔޫނީން ހުރަސްނާޅާނެ ކަމަށް ބުނި ނަމަވެސް، ފެންނަނީ އެ މަންޒަރު ނޫން ކަމަށް އަބޫ އުބަދައިދާ ބުންޏެވެ.

އަސީރުން ދޫކޮށްލުމަށް ހަދާފައި އޮތް އެއްބަސްވުމަށް ހަމާސްއިން އިހުތިރާމްކުރާނެ ކަމަށް އެ ޖަމާއަތުން ބުންޏެވެ. އަސީރުން ދޫކޮށްލުމުގައި ތަދިތަކެއް ހުރި ނަމަވެސް، އެއްބަސްވުން ބޮލާލައި ނުޖަހާނެ ކަމަށް ވެސް ހަމާސްއިން ވަނީ ބުނެފަ އެވެ.