މި އަހަރުގެ ރަމަޟާން މަހު ތަކެތީގެ އަގު ބޮޑުކޮށް ވިއްކާނަމަ އެކަން ސަރުކާރުގެ ސަމާލުކަމަށް ރައްޔިތުން ގެނައުމަށް އިގްތިސޯދީ ވަޒީރު މުހައްމަދު ސައީދު ވިދާޅުުމުން ރައީސް އަބްދުﷲ ޔާމީންގެ ވަރުގަދަ ރައްދެއް އަމާޒު ކުރައްވައިފިއެވެ.

ރައީސް ޔާމީންގެ ރައްދު އަމާޒުކުރެއްވީ އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގެ މައުޟޫއަށް އިންސާފު ކޮށްދެއްވާ އޯޑިއެންސްގައި އިންނަވާ ދެއްކެވި ވާހަކަފުޅުގައެވެ.

ރައީސް ޔާމީން ވިދާޅުވީ، ތަކެތީގެ އަގު ބޮޑުވާ ނަމަ އެކަން ސަރުކާރަށް އެންގުމަށް އިގްތިސޯދީ ވަޒީރު ރައްޔިތުންނަށް ގޮވާލާފައިވާއިރު އެ ތަކެތީގެ އަގު ދަށްކުރުމަށް ސަރުކާރުން ކުރާ ކަމެއް އަދި ތަކެތީގެ އަގު ބޮޑުކޮށްފި ނަމަ ސަރުކާރުން ކުރާނެ ކަމެއްވެސް ބުނެދެވިފައިނުވާ ކަމަށެވެ.

ރައީސް ޔާމީން ވިދާޅުވީ ސަރުކާރުން އެއްވެސް ކަމެއް ހާމައަށް ރައްޔިތުންނަށް އަންގާ ނުދޭ ކަމަށާ މުޅިން ވެސް ގެންދަނީ ތާކުން ތާކު ނުޖެހޭ، ސްވީޕިން ސްޓޭޓުމަންޓުތަކެއް ހަދަމުން ކަމަށެވެ.

ރައީސް ޔާމީން ވަނީ ސަރުކާރުން ރައްޔިތުންނަށް ކިޔައިދޭ ވާހަކަތަކަކީ ޚިޔާލީ ފޮލާގެ ގޮތުގައި ސިފަކުރައްވާފައެވެ. އެގޮތުން ރައީސް ޔާމީން ވިދާޅުވީ އެއް އަހަރުވެގެން ދިޔައީމަވެސް ސަރުކާރުން ރައްޔިތުންނަށް ކިޔައި ދެނީ އަލިފު ލައިލާ ވާހަކަ ކަމަށެވެ.