ގައުމު ނުދަރުވާ މި ސަރުކާރުން ސަލާމަތްކޮށްފި ކަމަށް ބުނި ބުނުމަށް ރައީސް ޔާމީން ވަނީ ރައްދު ދެއްވާފައި / ތޭރަ އޮންލައިން
ސިޔާސީ
ރައީސް ޔާމީން ސަރުކާރަށް: އިންފްލޭޝަން 3 އިން ސައްތައަށް ތިރި ކުރި ގޮތުގެ ޖާދޫ ކިޔާލަ ދެއްވާ
Mariyam Isaadha
މަރިޔަމް އިސާދާ
19 ފެބްރުއަރީ 2025
މާލެ ސިޓީ

ރާއްޖޭގެ އިންފްލޭޝަން މިހާރު ހުރި 3 އިން ސައްތައަށް ތިރިކުރެވިފައި ކަމަށް އިކޮނޮމިކު މިނިސްޓަރު މުހައްމަދު ސައީދު ވިދާޅުވެފައިވާތީ އެ މިންވަރަށް އިންފްލޭޝަން ތިރިކުރި ގޮތެއް ކިޔާ ދިނުމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އާދިއްތަ ދުވަހުގެރޭ ޕީއެންއެފްއިން ބޭއްވި ޖަލްސާގައި ރާއްޖޭގެ އިގްތިސޯދު އޮތް ހާލަތަށް ނަޒަރު ހިންގަވާ ލައްވާ ރައީސް ޔާމީން ވިދާޅުވީ، ރާއްޖެ ނުދަރާ އޮތް ކަމަށް ސައީދު ވިދާޅުވާއިރު ގައުމު ނުދަރާ އޮތް ގޮތަކާ މެދު ސުވާލު އުފެދޭ ކަމަށެވެ.

މީގެ އިތުރުން ވޯލްޑް ބޭންކުގެ ފޯކާސްޓާ ގުޅިގެން މިނިސްޓަރު ސައީދު ދެއްކެވި ވާހަަކައަށް ރައީސް ޔާމީން އަލިއަޅުވާލެއްވިއެވެ. އެގޮތުން މިއަހަރު ރާއްޖޭގެ އިންފްލޭޝަން 7 ޕަސެންޓާ 8 ޕަސެންޓާ ދެމެދަށް އުފުލިގެން ދާނެ ކަމަށް ވޯލްޑް ބޭންކުން ހާމަކުރި ނަމަވެސް އެހެން އެކަން ނުވާ ކަމަށާ ސަރުކާރުން އެޅި ފިޔަވަޅުތަކުގެ ސަބަބުން 3 ޕަސެންޓަށް އިންފްެލޭޝަން ތިރިވެފައިވާ ކަމަށް ވެސް ސައީދު ވިދާޅުވިކަން ފާހަގަކުރައްވާ ރައީސް ޔާމީން ވަނީ އެއީ ރޯ ބުހުތާނު ދޮގު ވާހަކަތަކެއް ކަމަށް ވިދާޅުވެފައެވެ.

ސައީދު އެބަ ވިދާޅުވޭ ވޯލްޑް ބޭންކު ފޯކާސްޓުގައި ރާއްޖޭގެ އިންފްލޭޝަން 7 ޕަސެންޓާ 8 ޕަސެންޓަށް އުފުލޭނެ ކަމަށް އޮތް ނަމަވެސް އެހެން އެކަން ނުހިނގާ ކަމަށް. ތިމަންނާމެން އެކަން ކޮންޓްރޯލުކޮށް 3 އިން ސައްތައަށް އިންފްލޭޝާން ތިރިކޮށްފައިވާ ކަމަށް. މީ ހަމަ ރޯ ބުހުތާނު ވަހަކަތކެއް. ރާއްޖޭގެ އިންފްލޭޝަން ނުހުންނާނެ 3 ޕަސެންޓްގައި. ކާކު ހެދި ހިސާބެއްތޯ؟ ވޯލްޑް ބޭންކުގެ ފޯކާސްޓިންއިންގަ އަދި އެއްކަމެއްވެސް ކައްސާލައިގެން ނުދޭ. ކައްސާލައިގެން ނުދާއިރު މި ބޭފުޅުން ވިދާޅުވާން ވާނެ އެ ފޯކާސްޓު ކީއްވެގެން ކޮން ކަހަލަ ޖާދުލެއް ހަދައިގެންކަން މި 3 ޕަސެންޓަށް ތިރިކުރީ. ލާރި ކަރަދުކުރާ ނިކަމެތިންނާ މެދު ފަންތީގެ މީހުންނަށް އެނގެ ޚަރަދުކުރަން ޖެހޭ މިންވަރު. އެކައްޗެއްގެވެސް އަގު ތިރިނުވޭ.

- ރައީސް ޔާމީން

ރައީސް ޔާމީން ވިދާޅުވީ، ތަކެތީގެ އަގު ބޮޑުވާ ނަމަ އެކަން ސަރުކާރަށް އެންގުމަށް އިގްތިސޯދީ ވަޒީރު ރައްޔިތުންނަށް ގޮވާލާފައިވާއިރު އެ ތަކެތީގެ އަގު ދަށްކުރުމަށް ސަރުކާރުން ކުރާ ކަމެއް އަދި ތަކެތީގެ އަގު ބޮޑުކޮށްފި ނަމަ ސަރުކާރުން ކުރާނެ ކަމެއްވެސް ބުނެދެވިފައިނުވާ ކަމަށެވެ.

ރައީސް ޔާމީން ވިދާޅުވީ ސަރުކާރުން އެއްވެސް ކަމެއް ހާމައަށް ރައްޔިތުންނަށް އަންގާ ނުދޭ ކަމަށާ މުޅިން ވެސް ގެންދަނީ ތާކުން ތާކު ނުޖެހޭ، ސްވީޕިން ސްޓޭޓުމަންޓުތަކެއް ހަދަމުން ކަމަށެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved