ވިސްލު ބްލޯ ގާނޫނުގެ ދަށުން ފުރަތަމަ ޖޫރިމަނާ ކުރި އިދާރާއަކަށް މޯލްޑީވަސް ޕޯސްޓު ލިމިޓެޑް ވެއްޖެއެވެ.
އެގޮތުން ޕޯސްޓުގެ ވަޒީފައިގައި ހުރެ މުވައްޒަފަކު ވިސްލު ބްލޯ ކުރުމުން ޕޯސްޓުން ވަނި އެ މުވައްޒަފު ވަޒީފާއިން ވަކިކޮށްފައެވެ. އަދި އޭނާއަށް އަނބުރާ ވަޒީފާ ދިނުމަށް ވިސްލް ބްލޯވާ ޕްރޮޓެކްޝަން ޔުނިޓުން އަމުރު ކުރުމުން ވެސް ޕޯސްޓުން އެ އަމުރަށް ވެސް ތަބާވެފައިނުވެއެވެ. ޕޯސްޓުން އޭނާ ވަޒީފާއިން ކަނޑާލީ ވަޒީފާއިން ކަނޑާނުލުމަށް ވިސްލް ބްލޯވާ ޕްރޮޓެކްޝަން ޔުނިޓުން އަމުރުކޮށްފައިވެސް ވަނިކޮށެވެ.
އެހެންކަމުން ވިސްލް ބްލޯވާ ޕްރޮޓެކްޝަން ޔުނިޓުގެ ދެ އަމުރަށް ޕޯސްޓުން ތަބާނުވުމުން އެ ޔުނިޓުން ވަނީ މޯލްޑީވްސް ޕޯސްޓު ލިމިޓެޑް ނުވަ ލައްކަ ރުފިޔާއިން ޖޫރިމަނާ ކޮށްފައެވެ.
މިއީ 2019 ގައި ވުޖޫދަށް އައި ވިސްލްބްލޯވާ ޕްރޮޓެކްޝަން ގާނޫނުގެ ދަށުން ހިންގާ ވިސްލް ބްލޯވާ ޕްރޮޓެކްޝަން ޔުނިޓުގެ ފަރާތުން އެއްވެސް އިދާރާއެއް ޖޫރިމަނާ ކުރި ފުރަތަމަ ފަހަރެވެ.
