

ފަނަރަ މަސްދުވަހުގެ ހަނގުރާމައިގައި އިސްރާއީލުން ދިން ހަމަލާތަކުގެ ސަބަބުން ގެއްލުން ލިބިފައިވާ ގާޒާ އަލުން ބިނާކުރުމަށް 50 ބިލިއަން ޑޮލަރަށްވުރެ ގިނަ ފައިސާ ބޭނުންވާނެ ކަމަށް އެކްސްޕާޓުން ލަފާކުރެ އެވެ.
އދ ން އެގޮތަށް ހާމަކޮށްފައި ވަނީ ޣައްޒާ އަލުން އާރާސްތު ކުރާނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ހުށަހެޅުއްވުމުގެ ބަދަލުގައި ޣައްޒާ އާރާސްތު ކުރުމަށް އަރަބި ގައުމުތަކުން ވިސްނަމުންދާ ދަނޑިވަޅެއްގައެވެ.
އަންގާރަ ދުވަހު އާންމުކުރި ގާޒާ އެންޑް ވެސްޓް ބޭންކް އިންޓަރިމް ރެޕިޑް ޑޭމޭޖް އެންޑް ނީޑްސް އެސެސްމަންޓް (އައިއާރުޑީއެންއޭ) އިން ހިސާބުކޮށްފައިވާ ގޮތުގައި ސަހްޔޫނީން ގާޒާއާ ދެކޮޅަށް ކުރި ހަނގުރާމައިގެ ސަބަބުން 2023 ވަނަ އަހަރު އޮކްޓޯބަރު 8 އާއި 2024 ވަނަ އަހަރުގެ އޮކްޓޯބަރު 8 އާ ދެމެދު 49 ބިލިއަން ޑޮލަރުގެ ގެއްލުން ލިބިފައިވެއެވެ.
އެ ރިޕޯޓުގައި ބުނެފައިވާ ގޮތުގައި ކުރިއަށް އޮތް 10 އަހަރު ތެރޭގައި ފަލަސްތީނުގެ ސަރަހައްދު އަލުން އާރާސްތުކުރުމަށް 53.2 ބިލިއަން ޑޮލަރު ބޭނުންވާނެއެވެ. އަދި ފުރަތަމަ ތިން އަހަރު ތެރޭގައި އެކަނިވެސް 20 ބިލިއަން ޑޮލަރު ބޭނުންވާނެ ކަމަށް ހާމަކޮށްފައިވެއެވެ.
އަލުން ބިނާކުރުމަށް ލަފާކުރެވޭ ޖުމްލަ ޚަރަދުގެ ދެބައިކުޅަ އެއްބައި ނުވަތަ 29.9 ބިލިއަން ޑޮލަރު ހަލާކުވެފައިވާ އިމާރާތްތައް ބިނާ ކުރުމަށާއި އެހެނިހެން މުހިންމު އުމްރާނީ ތަރައްގީގެ މަސައްކަތްތަކަށް ބޭނުންވެ އެވެ.
ގާޒާގެ މުސްތަގުބަލާ މެދު މަޝްވަރާކުރުމަށް އަރަބި ހަތް ގައުމެއްގެ ލީޑަރުން ވެސް އިއްޔެ ސައޫދީ އަރަބިއްޔާގެ ވެރިރަށް ރިޔާޒުގައި ބައްދަލުކުރައްވައިފި އެވެ.
މި ބައްދަލުވުމަކީ ސައޫދީ އަރަބިއްޔާގެ ކްރައުން ޕްރިންސް މުހައްމަދު ބިން ސަލްމާންގެ އިސްނެންގެވުމަކަށް ބޭއްވުނު ބައްދަލުވުމެކެވެ. މި ބައްދަލުވުމުގައި ޖޯޑަންގެ ކިންގް އަބްދުﷲ، މިސްރުގެ ރައީސް އަބްދުލް ފައްތާހް އަލްސީސީ، ގަތަރުގެ އަމީރު ޝެއިޚް ތަމީމް ބިން ހަމަދު އާލް ސާނީ، ޔޫއޭއީގެ ރައީސް ޝެއިޚް މުހައްމަދު ބިން ޒާޔިދު އާލް ނަހްޔާން، ކުވެއިތުގެ އަމީރު ޝެއިޚް މިޝްއަލް އަލްއަހްމަދު އާލް ސަބާހް އަދި ބަހްރެއިންގެ ކްރައުން ޕްރިންސް ސަލްމާން ބިން ހަމަދު އާލް ޚަލީފާ ބައިވެރިވެވަޑައިގެންނެވި އެވެ.
ސަހްޔޫނީން ގާޒާއަށް ދެމުންދާ ހަމަލާތައް ހުއްޓާލަން އެއްބަސްވެ، ގަތުލްއާންމަށް ކޮންމެވެސް ވަރެއްގެ ހުއްޓުމެއް ވަނީ އައިސްފަ އެވެ. ނަމަވެސް ސަހްޔޫނީން ދަނީ އެއްބަސްވުމާ ހިލާފުވެ މަދުން ނަމަވެސް ގާޒާއަށް ހަމަލާތައް ދީ މީހުން މަރަމުންނެވެ.
ހަމަލާތައް ހުއްޓާލި ފަހުން ހަމާސްއިން ރަހީނު ކޮށްފައި ތިބި ސަހްޔޫނީންގެ ބައެއް މީހުން މިހާތަނަށް ދޫކޮށްލާފައިވާއިރު، ސަހްޔޫނީން ރަހީނު ކޮށްފައި ތިބި ބައެއް ފަލަސްތީނު މީހުން ވެސް ވަނީ ދުކޮށްލާފަ އެވެ.
ސަހްޔޫނީން ގާޒާއަށް ދެމުން އަންނަ ހަމަލާތަކުގައި 62،700 މީހުން ޝަހީދުކޮށްލައިފަ އެވެ. ހަމާސްގެ ހަމަލާތަކުގައި ސަހްޔޫނީންގެ ތެރެއިން މަރުވީ 1،139 މީހުންނެވެ.